Autoridade RAEOA halo teste swab masal. Imajen/Media RAEOA.

DILI, 26 fevereiru 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa liuhosi Servisu Komisaun Rejionál Prevensaun no Mitigasaun Surtu COVID-19 RAEOA ho Komisaun Nasional-Pilar 3 no Pilar 5 Ministériu Saude halo ona swab nose test masál ne’ebé realiza iha 17-25 fevereiru 2021 nia rezultadu atinji ona 100%.

Swab Nose Test masál ba RAEOA to’o loron horisehik 24 fevereiru 2021, nia rezultadu atinji ona 100%. Ha’u hanoin sampel ne’ebé foti ona hamutuk ema na’in-1,013, rezultadu teste negativu ema na’in-252, hein rezultadu teste ema na’in-761,” Arsénio Paixao Bano hateten ba Agênsia TATOLI liuhosi telefónika, sesta ne’e.

Nia hatutan, alvu inisiál atu halo Swab Nose Test masál ba ema na’in-900 iha RAEOA. Tuir loloos, nia dehan, planu kalendáriu Swab Nose Test masál ba RAEOA sei ramata iha 27 fevereiru 2021.

Tanba ne’e, nia husu ba públiku liuliu ba Oé-Cusse-oan sira atu nafatin halo tuir protokolu prevensaun COVID-19 nian hodi uza máskara, halo distánsia sosiál, fase liman bebeik ho sabaun, labele hakat liu fronteira, labele halo tranzasaun ilegáll.

“Karik iha maluk ruma atu mai teritóriu RAEOA, favór informa ba ekipa servisu liña frente ba COVID-19 atu ba hasoru mak simu hodi lori ba kuarentena,” nia hameno.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here