Imajen/Media F-FDTL.

DILI, 26 fevereiru 2021 (TATOLI)—Prezidente Repúblika, Francisico Guterres Lú Olo, ohin, prezide serimónia promosaun ba postu ofisiál jenerál no Jenerais tuir estatutu militár foun F-FDTL nian ne’ebé realiza iha Palásiu Prezidensiál Nicolau Lobato, Dili.

Notísia Relevante: Prezidente Repúblika halo promosaun ba postu ofisiál jenerál-jenerais

“Promosaun sira-ne’e bazea ba estatutu militár foun F-FDTL nian. Importante tetu didi’ak oinsá kareira militár halo progresaun, liuhosi mekanizmu hirak ne’ebé regula atu fó dalan ba ida-idak nia hakarak no asegura ekilíbriu adekuadu ba iha estrutura militár F-FDTL. Tanba ne’e mak ita presiza adapta kuadru F-FDTL tuir organizasaun nia nesesidade estruturál sira, liuhosi revizaun ida ba efetivu kuadru permanente sira, integra ka lae, iha estrutura órganika F-FDTL,” Xefe Estadu, Francisco Guterres Lú Olo, hateten liuhosi ninia diskursu.

Lú Olo hatutan, iha aprovasaun Estatutu Militár foun FALINTIL-Forsas Defeza Timor-Leste (F-FDTL) nian, responsável sira buka adapta ba reforma sira-ne’ebé halo daudaun hodi hadi’a aspetu balun iha estatutu kondisaun militár nian hodi labele sees hosi mudansa sira seluk ne’ebé akontese tiha ona,

Nia dehan, ajustamentu sira-ne’e halo iha ámbitu F-FDTL nia mak re-estrutura, jestaun ba efetivu militár sira no iha ninia prosesu modernizasaun.

“Iha Estatutu militar sira-nian, aleinde mudansa sira seluk, muda ona naran ba postu ofisiál jenerál atu labele sees hosi naran sira-ne’ebé país belun sira uza ba sira-nia forsa armada. Pur ezemplu, ba sira ne’ebé la halo parte ona ierarkia militár, bele hetan asesu ba postu onorfiku, nu’udar Jenerál ka Almirante,” nia hateten.

Imajen/Media F-FDTL.

Xefe Estadu ne’e hateten, kargu Xefe Estadu-Maiór Jenerál Forsa Armada kaer hosi Tenente-Jenerál; kargu Vise-Xefe Estadu-Maiór Jenerál Forsa Armada hosi Majór-Jenerál no kargu Xefe Estadu-Maiór Forsa Armada hosi Brigadeiru-Jenerál; no tempu mandatu ba XEMJFA no Vise-XEMJFA hanaruk ba tinan lima, ne’ebé bele hatutan dala ida de’it ho tempu hanesan.

Tanba ne’e, nia dehan, Timor-Leste presiza hanoin kle’an atu nune’e instituisaun sira bele tetu hikas fali kona-ba sira-nia knaar iha tempu foun ohin loron nian, nakonu ho dezafiu no mudansa relasiona ho paradigma seguransa nian.

“Vizaun kona-ba Forsa Armada nian, prontu no ho naran-morin hodi serbí Timor-Leste no seguransa ema hotu-hotu ninian. Ezije katak forsa ne’e tenke hamriik ho ema ne’ebé kompetente no prontu atu serbisu ho laran-haksolok. Lidera hosi líder hirak ne’ebé hatene inspira sira no hako’ak ema hotu. Líder sira-ne’ebé bele kontribui ba hasa’e militár ida-idak ninia nível dezempeñu no satisfasaun profisionál no fó dalan ba ema ida-idak bele afirma ninia-aan,” nia dehan.

Lú Olo reforsa katak estrutura lideransa ba Komandu F-FDTL no Ofisiál Jenerál sira-ne’ebé halo parte hosi estrutura hirak-ne’e, tenke iha kbiit atu hatán ba dezafiu no mudansa sira-ne’e no tenke iha mós kapasidade no preparadu atu hala’o knaar ne’ebé de’it iha estrutura laran, la’ós de’it iha komponente fiksa maibé mós iha komponente operasionál hosi Sistema Forsa Nasionál.

Nia husu ba forsa armada tenke prepara-aan, liuliu domina lian Inglés hodi kaer knaar reprezentasaun nasionál iha organizasaun internasionál sira ka komanda ka halo parte hosi estrutura komandu forsa multinasionál sira-nian iha ámbitu misaun apoiu ba pás.

“Iha tempu ida ne’ebé F-FDTL sei simu tan responsabilidade boot iha rai-laran no iha rai-li’ur, tanba instituisaun iha hela faze restruturasaun interna. Ita tenke hili duni ba ofisiál jenerál, ofisiál sira-ne’ebé kompetente liu, ho kualifikasaun tékniku-profisionál, esperiénsia no kapasidade komandu, iha rekoñesimentu no prestíjiu iha meiu militár ka sivíl hodi hasoru dezafiu sira-ne’e,” Prezidente Repúblika reforsa.

Prezidente Repúblika, nu’udar Komandante Supremu Forsa Armada, hafoin simu proposta husi Konsellu Ministru, iha kompeténsia rasik atu halo promosaun militár sira-nian ba postu ofisiál jenerál no promosaun ofisiál jenerál sira-nian.

“Ho ne’e, justu tebe-tebes Komandante Supremu fó rekoñesimentu públiku iha serimónia ida-ne’e ho distintivu Ofisiál Jenerál ba Jenerál foun sira Falintil-Forsas Defeza Timor-Leste ba sira-nia esforsu no dedikasaun tomak iha misaun sira-ne’ebé ida-idak simu, hosi horiuluk to’o ohin loron. Ha’u hato’o ha’u-nia votu susesu boot ba knaar foun no susar ne’ebé ita-boot sira foin simu,” Xefe Estadu ne’e hateten.

Notísia Relevante: Lere: “Sai komandante di’ak presiza lealdade, onestidade no unidade”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here