DILI, 26 fevereiru 2021 (TATOLI)-Komandu Polísia Nasionál Timor-Leste (PNTL) Munisípiu Dili, kinta kalan (25/02), detein abitante na’in-tolu (mane de’it) ne’ebé tama ilegál hosi Atambua, Indonézia mai to’o Dili, Timor-Leste.
Polísia simu informasaun sidadaun hirak ne’e deskonfia tama hosi liña fronteira hafoin hakat liubá area jurizdisaun Indonézia, liuhosi Atambua, maibé bainhira atu fila-fali mai Timor-Leste dezvia hodi liuhosi dalan ilegál to’o hikas mai iha Dili.
Notísia Relevante : PNTL “serka” abitante Bobonaro no Covalima labele ba-mai Dili
Komandante PNTL Munisípiu Dili, Superintendente Xefe, Henrique da Costa, hateten hafoin simu informasaun ne’e polísia direta ba direta abitante na’in-tolu ne’e ida-idak nia rezidénsia iha Vera Crus, Dili hodi entrega ba ekipa saúde hodi submete ba konfinamentu obrigatóriu.
“Horikalan ita simu informasaun ema na’in-3 tama ilegál ne’ebé ekipa ba foti kedas no daudaun ne’e tama ona iha kuarentena,’’ Henrique da Costa informa ba jornalista sira, sesta ne’e, iha Komandu PNTL Munisípiu Dili.
Nia dehan, seidauk halo identifikasaun loloos sidadaun hirak ne’e tama ilegál hosi pontu entrada Munisípiu Covalima ka Bobonaro tanba kestaun saúde.
Komandu PNTL Dili liuhosi Sub Seksaun Polísia Komunitáriu halo ona vizita ba iha fatin eskola no komunidade hodi distribui broxura ne’ebé hakerek mensajen kona-ba regra saúde ba medida prevensaun COVID-19.
Henrique da Costa, orienta Ofisiál Polísia Suku (OPS) atu identifika ema ruma ne’ebé tama ilegál hosi fronteira ka hosi munisípiu Bobonaro ho Covalima mai Dili atu evita propagasaun peste letál COVID-19.
Jornalista : Nelson de Sousa
Editór : Francisco Simões
