Segundu Komandante Polísia Munisípiu Dili, Superintendente Euclides Belo hamutuk hom estudante no madre sira kuda Ai-kasi iha Jardin Motael, Dili. Imajen TATOLI/Arminda Fonseca.

DILI, 26 fevereiru 2021 (TATOLI)—Segundu Komandante Polísia Munisípiu Dili, Superintendente Euclides Belo, hateten polísia sei fó sansaun ba abitante ne’ebé mak atu estraga ai-horis sira ne’ebé kuda iha Dili-laran, tanba ne’e kontra lei ambiente nian.

Notísia Relevante: Don Virgílio-estudante sira kuda Ai-kasi 100 iha Jardin Motael

“Ai-horis ne’ebé ohin ita kuda ne’e, se mak estraga ne’e krime hasoru ambiente. Tanba iha dektretu Lei númeru, 26/2016 4 jullu, bazeia ba ambiente iha artigu 59 sita katak kona-ba responsabilidade no violasaun. Ne’ebé, bainhira iha infrasaun sira iha, lei ne’e konsidera nu’udár violasaun ne’ebé sei hetan kastigu ho koima ki’ik no boot liu define iha lei tuir infrasaun nia gravidade,” Superintendente Euclides Belo hateten ba jornalsita sira hafoin hamutuk ho Arsebispu Don Virgílido do Carmo da Silva kuda Ai-kasi iha Jardin Motael, Dili, sesta ne’e.

Aeinde ida-ne’e, nia dehan, iha responsabilidade ba violasaun nu’udár responsabilidade sivil ka kriminál mesak ne’ebé bele iha fatin tuir termu lei nian no bainhira hahalok hanesan ne’e mak hetan kastigu ba títulu krime nian, lahó prejuizu aplikasaun asesóriu prevee ona avaliasaun.

“Tanba ne’e, hatene ona lei mak sei kontra nafatin sansaun ne’ebé polísia halo mak kaer lori ba hatama sela. Tanba, Dili atu sai buras no matan presiza ita hotu-nia kontribuisaun,” nia dehan.

Nia hateten, presiza habali no hamatak Sidade Dili no programa ne’e presiza involve ema hotu-hotu tuir moto ne’ebé mak juntamente iha mak “Servisu Hamutuk Garante Kapitál Dili, Matak Ba Ema Hotu”, entaun labele hateten liafuan mamuk de’it maibé prenxe ho atividade sira-ne’ebé mak hanesan kuda ai-oan.

Tanba, nia dehan, bahinhira Ai-kasi ne’e matak fó espasu ba turista sira mai investe no bele halo dezenvolvimentu. 

“Tanba ne’e, ha’u konvida foinsa’e hotu-hotu ne’ebé vizita Jardin Motael karik, labele estraga hanesan sama ai-oan, fokit ka silu tohar, maibé ita hotu tenke kaer metin Prezidente Repúblika nia liafuan dehan ‘Ema Ida Ai-ihun Ida’. Ne’e signifika katak ema hotu tenke implementa ida-ne’e atu hatutan no labele hein ema seluk obriga ka orienta mak foin halo. Tanba, ita-nia inisiativa ne’e mai hosi ita-nia fuan, hanoin, hodi kontribui, nune’e labele estraga maibé ita hotu bali ho di’ak,” nia dehan.

Sidadaun sira-ne’ebé partisipa iha kuda Ai-kasi ne’e hanesan programa ne’ebé mak inísia konjuntamente hosi komunidade U-40, Sentru Estudu Jéneru Uiversidade Nasionál Timor-Leste (UNTL), Univerisidade da Paz, (UNPAZ), Sentru Estudu Coreia nian, Polísia Nasionál Timor-Leste (PNTL) Munisípiu Dili, hamutuk ho autoridade formál hosi Ministériu Agrikultura no Peskas (MAP) no dirasaun ne’ebé koloka iha Dili, hamutuk ho Meiu Ambiente liuliu parte igreja, hodi kuda Ai-kasi hun 100.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here