Membru Unidade Patrullamentu Fronteira (UPF) no FALINTIL-Forsa Defeza Timor-Leste (F-FDTL) blokeia estrada iha área Postu Administrativu Tilomar hodi evita abitante sira halo viajen hosi Suai ba Fatumea. Imajen Tatoli/Eugénio Pereira.

DILI, 26 fevereiru 2021 (TATOLI)— Parlamentu Nasionál halo ona ajendamentu ba loron 1 fulan-marsu kona-ba renovasaun deklarasaun Estadu Emerjénsia ba loron 30 tán.

“Iha ona ajendamentu ba loron 01 marsu (2021) hodi halo apresiasaun ba pedidu renovasaun Estadu Emerjénsia, tanba ita tama iha faze ida krusiál tanba mundu tomak hasoru pandemia ondas daruak,” Membru Parlamentu Nasionál, Deputadu Francisco Miranda Branco, informa ba jornalista sira iha Parlamentu Nasionál, sesta ne’e.

Nia dehan, númeru kazu COVID-19 gráfiku aas iha Europa, Estadu Unida Amérika (UEA) no oras ne’e viziñu Indonézia mós kontinua aumenta kada loron.

“Ita viziñu Indonézia (Atambua) rejista ona ema mate tanba ne’e Timor-Leste presiza reforsa liután medida prevensaun no Timor-Leste, presiza kontinua serka sanitária ba área sira-ne’ebé rejista ona kazu pozitivu COVID-19. Tan ne’e mak loron 1 marsu Governu sei mai hamutuk ho Parlamentu Nasionál hodi halo apresiasaun pedidu Prezidente Repúblika nian bazea ba proposta Governu nian,” nia dehan.

Entretantu, Vise-Prezidente Parlamentu Nasionál, Deputadu Luis Roberto da Silva, husu atu iha estensaun Estadu Emerjénsia dala-11 ne’e tenke reforsa medida prevensaun iha área fronteira.

“Segunda-feira agora (01 marsu) estende tán Estadu Emerjénsia ba dala-11. Tanba, ita haree ba númeru kazu pozitivu ne’ebé mak aumenta tán entaun nesesáriu aplika tán estensaun ne’e ba loron 30 tán,” Vise-Prezidente PN ne’e informa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here