Komunidade Suku Belulik Leten, Postu Administrativu Fatumea, Covalima, entuziazmu partisipa iha teste swab COVID-19. Imajen Tatoli/Eugénio Pereira.

DILI, 26 fevereiru 2021 (TATOLI)—Reprezentante Povu iha uma fukun Parlamentu Nasionál (PN) husu Governu oferese ai-han ba populasaun iha Munisípiu Covalima no Bobonaro ne’ebé oras ne’e iha hela serka sanitária.

Membru Parlamentu Nasionál, Deputadu Francisco Miranda Branco, hateten desizaun Governu nian deside lockdown ba komunidade Munisípiu Covalima no Bobonaro tenke materializa ho ai-han nune’e komunidade labele hamlaha.

“Ita estabelese lockdown ba Munisípiu Covalima no Bobonaro entaun Governu tenke hamosu medida ida hodi apoia ai-han nune’e materializa desizaun ida-ne’e. Se lae ita hasai tiha desizaun lockdown, povu labele sai hosi uma, depois povu hamlaha. Situasaun ida-ne’e obriga Governu atu fó ai-han ba fatin sira-ne’ebé serka sanitária ne’e,” Membru Parlamentu Nasionál, Deputadu Francisco Miranda Branco, informa ba jornalista sira, iha Parlamentu Nasionál, sesta ne’e.

Xefe Bankada FRETILIN ne’e konsidera desizaun Governu nian aplika serka sanitaria iha áera fronteira nesesita duni maibé oferese ai-haan ba komunidade nune’e labele sai ba buka ai-han.

Purtantu Vise-Prezidente Parlamentu Nasionál, Deputadu Luis Roberto da Silva, husu ba governu atu distribui ai-haan ba komunidade munisípiu Covalima no Bobonaro ne’ebé enfrenta ona lockdown ka serka sanitaria ne’e.

“Ne’e signifika limita ona direitu no liberdade sirkulasaun komunidade nian tanba komunidade hotu-hotu hakmatek iha idak-idak nia fatin. Tanba ne’e, husu ba Governu kria polítika ne’ebé di’ak atu bele apoia ai-haan ba ita-nia komunidade sira,” Deputadu Bankada KHUNTO ne’e fó hanoin ba VIII Governu Konstitusionál.

Reprezentante povu ne’e husu Governu fasilita mós máskara ba komunidade iha área fronteira hodi idak-idak halo prevensaun ba propagasaun surtu COVID-19 ne’e.

Nune’e mós Governu tenke kontinua fasilita ekipamentu protesaun pesoál apropriada ba ekipa liña frente ne’ebé oras ne’e halo hela prevensaun iha área fronteira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here