Reprezentante estudante na'in-97 hala'o konferénsia imprensa hafoin keixa MESSK ba Parlamentu Nasionál, sesta ne'e. Imajen TATOLI/Evaristo Soares Martins.

DILI, 26 fevereiru 2021 (TATOLI)—Estudante sira hosi Ensinu Tékniku Vokasionál (ETV) hamutuk na’in-97 keixa Ministru Ensinu Superiór, Siénsia no Kultura (MESSK) Longuinhos dos Santos ba Komisaun G ne’ebé trata asuntu edukasaun, juventude, kultura no sidadania tanba ministériu la define valór entre ensinu sekundáriu jerál no ensinu tékniku vokasionál.

Reprezentante estudante na’in-97, Manuel Gomes ‘Laku-Riak’, hateten estudante sira hosi ETV la asesu ba Ensinu Superiór Universidade Nasionál Timor Lorosa’e (UNTL) tanba valór hanesan ho Ensinu Sekundáriu Jerál (ESG-sigla portugés).

“La asesu tanba iha buat balu presiza ita hadi’a kona-ba ekivalénsia valór entre Ensinu Tékniku Vokasionál no Ensinu Sekundáriu Jerál. Ensinu tékniku sira-nia valór kiik tanba matéria haat de’it. Agora sira ensinu sekundáriu jerál ne’e iha matéria neen, se valór ne’e ita multiplika ne’e la hanesan,” Veteranu Laku-Riak informa ba jornalista sira hafoin hato’o keixa ba Parlamentu Nasionál, sesta ne’e.

Nia dehan, ensinu tékniku vokasionál laiha ida tama iha UNTL tanba estudante tékniku valór la hanesan ensinu sekundária jerál.

“Preokupasaun ne’e mak halo ami mai to’o iha-ne’e (Parlamentu Nasionál) tanba parlamentu nu’udar reprezentante povu mak bele hatutan kestaun ne’e ba Governu,” nia dehan.

Nia hatutan, estudante hosi ensinu tékniku vokasionál ho valór 44, 43 no balun 30 maibé la admitidu ba UNTL tanba valór la hanesan ensinu sekundária jerál.

Nia dehan, loloos ne’e estudante sira hosi ensinu tékniku vokasionál tenke asesu ba universidade estadu nian ne’e maibé tenke kria regulamentu ida entre ensinu rua tanba matéria la hanesan.

“Ohin ami mai hato’o kestaun estudante la asesu tinan akadémiku 2021, atu nune’e lori sira-nia lamentasaun kona-ba la asesu UNTL,” nia dehan.

Hatán ba kestaun ne’e, Prezidente Komisaun G, Deputadu António Verdiál de Sousa, hateten komisaun simu ona keixa balun hosi estudante sira ne’ebé la liu iha prosesu ezame atu asesu ba UNTL.

“Hanesan reprezentante povu prontu simu kualkér keixa maibé ami labele manda Governu tanba ne’e kompeténsia ezekutivu nian. Ami simu keixa kona-ba atu asesu ba UNTL ne’e 100-resin. Kona-ba solusaun ne’e Governu nia kompeténsia,” Prezidente Komisaun G ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here