PNTL Munisípiu Dili, Superintendente Xefe, Henrique da Costa, halo lansamentu ba livru formatu servisu OPS atu vizita komunidade sira iha ida-idak nia uma. Imajen Tatoli/Nelson de Sousa

DILI, 26 fevereiru 2021 (TATOLI)-Komandante Polísia Nasionál Timor-Leste (PNTL) Munisípiu Dili, Superintendente Xefe, Henrique da Costa,  sesta ne’e,  iha Komandu Munisípiu Dili, ofisiálmente halo lansamentu ba livru formatu servisu Ofisiál Polísia Suku (OPS) atu vizita komunidade sira iha ida-idak nia uma.

Superintendente Xefe Henrique da Costa, hateten lansamentu ba livru formatu vizita servisu OPS ba suku sai hanesan estratéjia hosi Komandu Munisípiu Dili nian atu nune’e polísia hakbesik liután ba iha komunidade.

Notísia Relevante : 2020, akontese kazu krime 1.694 iha Dili

Hahú iha loron 01 marsu, tinan ne’e, membru OPS sei tama-sai uma iha ida-idak nia area iha area jurizdisaun Munisípiu Dili atu ko’alia direita ho komunidade sira .

“Formatu  ne’ebé iha ba  informasaun ne’ebé hakarak rekolla mak hanesan sei haree ba iha uma-kain ida ema na’in hira  no ema ne’e servisu saida no ninia ligasaun ho komunidade ka viziñu oinsá no durante iha hela fatin ema ruma ba ameasa ka iha nia uma hetan tuda beibeik no problema kazu rama ambon, na’ok ho sira seluk ida ne’e mak ita prepara iha formatu laran,” Komandante PNTL  Munisípiu Dili Superintendente Xefe, Henrique da Costa hateten ba jornalista sira.

Nia hateten, hosi relatóriu membru OPS sira rekolla iha formatu livru sei relata ba komandu munisípiu hafoin identifika durante vizita komunidade enfrenta problema ka krime saida mak sempre akontese iha ida-ida nia area. Nune’e, KMD sei  analiza hodi prepara medida oinsá halo prevensaun  no medida represiva ruma atu nune’e redús krime iha suku ida-idak.

“Atu halakon krime imposivel, maibé buka maneira oinsá mak atu nune’e prevene krime no prezensa polísia nian iha komunidade atu sente seguru” Henrique da Costa hateten.

Nia hateten, membru OPS hamutuk na’in-36  mak partisipa iha serimónia lansamentu  no sira hetan ona formasaun atu bele tun ba baze rekolla informasaun tuir formatu ne’ebé iha sei kobre iha area jurizdisaun Dili.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here