Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (26/02). Imajen TATOLI/Egas Cristóvão

DILI, 26 fevereiru 2021 (TATOLI)–Konsellu Ministru (KM) estraórdinaria iha sesta ne’e, analiza aprezentasaun hosi responsável Sala Situasaun, Sentru Integradu Jestaun Krize (CIGC, sigla portugés) kona-ba pontu situasaun foun COVID-19 iha Timor-Leste.

“Tuir dadus ne’ebé aprezenta, iha ámbitu teste masál ne’ebé realiza ona, halo ona rekolla ba amostra sira totál hamutuk 2.648,” haktuir nota imprensa ne’ebé Agência TATOLI asesu, sesta ne’e.

Totál amostra hirak ne’e foti iha munisípiu Bobonaro, Covalima no iha Rejiaun Administrativa Espesiál Oé-cusse Ambeno (RAEOA) no hosi amostra ne’e mak deteta iha hitu ho rezultadu pozitivu.

“Kazu hitu deteta iha postu administrativu Fatumea, munisípiu Covalima, ne’ebé rejista ona transmisaun lokál ba dahuluk, maibé deteta ona orijen surtu maski seidauk iha evidénsia katak sai ba fatin seluk,” subliña nota ezekutivu.

Ho nune’e, kazu ativu COVID-19 iha Timor-Leste hamutuk 21 ne’ebé pasiente hirak ne’e baixa hela iha sala izolamentu Vera Crus, hosi totál kazu konfirmadu desde marsu 2020 to’o agora hamutuk 110, rekuperadu 93 no seidauk rejista ema mate.

Enkuantu, númeru ema ne’ebé submete ona ba teste hosi marsu 2020 to’o ohin loron hamutuk 21.162, ne’ebé ho rezultadu negativu 20.914 no hein rezultadu 138.

Hahú 23 fevereiru, Timor-Leste tama ba faze  hanaran alerta 3 ka faze ‘’mitigasaun’, ne’ebé aplika ba Timor-Leste tomak maibé serka sanitária aplika de’it ba munisípiu Covalima no Bobonaro, tuir Rezolusaun Governu númeru 4 no 5, 15 fevereiru, ne’ebé mensiona ema ka sasán atu tama no sai bá munisípiu rua ne’e, tenki iha autorizasaun hosi Sala Situasaun CIGC.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here