Sentru Saúde Comoro. Imajen Tatoli/Egas Cristovão.

DILI, 26 fevereiru 2021 (TATOLI)—Durante fulan janeiru to’o fevereiru, Sentru Saúde Comoro rejista inan isin-rua hamutuk 445.

Xefe Sentru Saúde Comoro, Emelia Sousa, esplika iha janeiru na’in 328 no fevereiru na’in 127 ne’ebé maioria partu iha fasilidade saúde no oitoan de’it mak partu iha uma ho tulun hosi parteira no família.

Notísia Relevante:MS hametin liu-tán ligasaun pesoál saúde ho inan isin-rua

“Janeiru, inan-sira ne’ebé partu iha fasilidade saúde hamutuk 139 no partu iha uma na’in-ida. Signifika, nia partu rasik iha uma depois mak bolu parteira. Alende ne’e, na’in-tolu mak hetan atendimentu direta hosi profisionál saúde iha uma,’’ Emelia Sousa hateten ba jornalista Agência Tatoli iha serbisu fatin, sesta ne’e.

Iha fali fulan fevereiru, nia dehan, inan sira ne’ebé rejistu iha Sentru Saúde Comoro hamutuk 127 no partu iha fasilidade saúde hamutuk  119, partu iha uma na’in-rua no atende hosi pesoál saúde iha uma na’in-neen.

Hosi númeru ne’e, Xefe Sentru Saúde Comoro konsidera iha mudansa di’ak tanba inan balun lakohi mai konsulta, maibé ho mensajen-sira liu hosi programa liga-inan, sempre iha komunikasaun kontinua ho parteira-sira no ikus-mai ba partu iha fasilidade saúde.

Entretantu, Parteira-sira ne’ebé durante ne’e atende inan isin-rua sira iha Sentru Saúde Comoro hamutuk 26.

Jornalista: Felicidade Ximenes

Editór: Cipriano Colo

1 KOMENTÁRIU

HAKEREK NO HATÁN

Please enter your comment!
Please enter your name here