Imajen Tatoli/Evaristo Soares Martins.

DILI, 26 fevereiru 2021 (TATOLI)—Sekretariadu Komisaun Polítika Frente Revolusionária Timor-Leste Independente (FRETILIN) Munisípiu Dili husu militante atu tuur hakmatek akompaña desizaun ba Kongresu Nasionál hosi lideransa Komité Sentrál FRETILIN (CCF-sigla portugés).

“Husu ba militante FRETILIN sira atu tuur hakmatek no akompaña desizaun hosi reniaun hosi Komité Sentrál FRETILIN (CCF-sigla portugés) iha tempu badak, hodi prepara ba kongresu nasionál. Tanba, kongresu nasionál mak órgaun aas liu iha partidu hodi deside destinu partidu FRETILIN nian, ba tinan lima oin mai,” Vise-Koordenadór Partidu FRETILIN Munisípiu Dili, Libert Soares, informa liuhosi konferénsia imprensa iha CCF, Comoro, Dili, sesta ne’e.

Vise-Kooordenadór FRETILIN Munisípiu Dili ne’e hateten, aprezentasaun kandidatura ba lideransa FRETILIN tuir estatutu, tenke aprezenta kandidatu na’in-rua, Prezidente no Sekretáriu Jerál iha pakote ida de’it maibé tenke aprezenta iha loron kongresu nasionál.

“Karik reuniaun CCF deside ba eleisaun direta, KNPO (Komisaun Nasionál Preparasaun Organizasaun) sei loke tempu ba aprezentasaun pakote kandidatura nian. Militante sira tuur hakmatek, la presiza ba hakilar tún sa’e hodi fó opurtunidade ba ema seluk ne’ebé la perténsia ba FRETILIN atu tama halo barella iha FRETILIN nia uma laran,” nia dehan.

Vise-Koordenadór ne’e husu ba militante no kuadru sira iha baze, juventude FRETLIIN, OPMT, Organizasaun filiadu sira hotu iha Dili laran, atu konsentra ba serbisu hamutuk reforsa estrutura aldeia sira, Asembleia Jerál Militante (AGM-Sigla portugés) suku sira, Komisaun Polítika Postu Administratiu, hodi garantia vitória ba FRETILIN iha eleisaun prezidensiál iha 2022 no parlamentár 2023.

Nia apela ba militante no simpantizante FRETILIN hotu iha munisípiu Dili, mai hametin demokrasia iha uma laran Fretilin, hodi tane-aas valór luta FRETILIN nian ne’ebé eroi sira husik hela.

Entretantu, Vise-Prezidente Partidu FRETILIN Francisco Miranda Branco, fó-sai katak data ba kongresu nasionál seidauk deside.

“Data ba kongresu nasionál seidauk deside, posivelmente bele akontese iha marsu no abríl maibé ita iha hela Estadu Emerjénsia ita sei haree,” nia ko’alia iha Parlamentu Nasionál, sesta ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here