Administradór Munisípiu Ainaro, Leovigildo Amaral Pereira, halo juramentu bainhira simu pose iha serimónia tomada de pose ne’ebé realiza iha loron 25 fevereiru 2021 iha Ainaro. Imajen/Facebook: Racom Maubisse Mauloko.

DILI, 25 fevereiru 2021 (TATOLI)–Administradór Munisípiu Ainaro, Leovigildo Amaral Pereira, hateten nu’udár reprezentante Governu Sentrál iha Munisípiu Ainaro, iha mandatu tinan-lima dahuluk ne’e sei haree liu ba dezenvolvimentu infraestrututa bázika.

“Dahuluk, ha’u reprezenta Governu Sentrál iha Munisípiu Ainaro hanesan Administradór foun ne’ebé lidera Munisípiu Ainaro durante mandatu tinan-lima nia laran ne’e, ha’u-nia planu prioridade mak konsentra liu ba dezenvolvimentu infraestrutura bázika hanesan edukasaun, saúde, eletrisidade no bee-moos,” Leovigildo Amaral Pereira hateten ba Agência TATOLI hafoin simu pose hosi Xefe Governu ne’ebé reprezenta hosi Ministru Administrasaun Estatál Miguel Pereira de Cavalho, liuhosi telefónika, sesta ne’e.

Nia hatutan, iha mandatu tinan-lima nia laran ne’e, nia parte fó prioridade liu ba dezenvolvimentu infraestrutura báziku tanba populasaun ne’ebé moris iha munisípiu no área rurál presiza tebes mak infraestrutura bázika.

Administradór Munisípiu Ainaro, Leovigildo Amaral Pereira. Imajen/Facebook: Racom Maubisse Mauloko.

“Povu ne’ebé moris iha área rurál presiza mak hanesan eletrisidade no bee-moos. Aleinde ida-ne’e, ha’u sei haree mós ba sentru saúde sira-ne’ebé falta ekipamentu sira hanesan kama, rekursu umanu, atu nune’e bele fó atendimentu ne’ebé di’ak ba ita-nia populasaun sira-ne’ebé iha área rurál sira presiza. Tanba ne’e, ha’u administradór foun tenke haree uluk mak ida-ne’e,” nia hateten. 

Aleinde haree halo dezenvolvimentu ba infraestrutura, nia hateten, sei haree mós ba dezenvolvimentu ne’ebé durante ne’e iha Munisípiu Ainaro hanesan projetu ba estrada, ponte, postu no seluk tán ne’ebé durante ne’e la’o neineik iha Munisípiu Ainaro.

Maibé, nia hatutan, sei kontinua implementa planu sira-ne’ebé administradór sesante halo ona iha Munisípiu Ainaro tanba orsamentu prevee tiha ona.

“Ha’u sei kontinua Planu asaun ne’ebé Administradór sesante halo ona tanba planu sira ne’ebé nia orsamentu mós prevee ona. Hafoin ezekuta hotu ona planu asaun sira hosi administradór sesante mak foin ezekuta fali ha’u-nia planu,” nia hatutan.

Nia hateten, knaar bo’ot ne’ebé Governu Sentrál fó ona ba nia nu’udár responsavél ba Administrasaun Munisípiu Ainaro nian ne’e, nia promete ho Maromak nia tulun sei involve servidór Estadu tomak hosi liña sekretária nivél munisípiu nian, atu lori servisu administrasaun públika besik liu ba povu iha baze.

Jornalista : Arminda Fonseca 

Editór : Cancio Ximenes

HAKEREK NO HATÁN

Please enter your comment!
Please enter your name here