Programa Liga Inan. Imajen/Espesial.

DILI, 25 fevereiru 2021 (TATOLI)–Embaixadór Austrália ba Timor-Leste, Peter Roberts, hatetetn programa Liga Inan ne’e atu hakbesik ba inan isin-rua iha fasilidade saúde sira liuhosi númeru kontaktu 8080 iha Timor-Leste.

Notísia Relevante: Programa Liga Inan Hafasil Inan Isin Rua Asesu Fasilidade Saúde

“Programa Liga Inan ne’e atu konekta ba ita-nia inan isin-rua ba iha fasilidade saúde hahú periódu isin rua to’o tuur ahi,” Embaixadór Austrália hateten iha ámbitu serimónia programa lansamentu Liga Inan, iha Sentru Saúde Kampung Baru, Dili, kinta ne’e.

Tuir nia, iha pesoál saúde iha Timor-Leste apresia tebes ho liga inan ne’e, tanba hafasil sira-nia servisu no fó informasaun no komunikasaun ne’ebé di’ak ba inan isin rua sira.

Liuhosi programa ne’e, halo inan isin-rua hakarak tanba sira bele hetan mensajén informasaun kona-ba inan isin rua iha semana ida dala rua (tersa no kinta).

“Hosi ne’e ha’u apresia ho Organizasaun Katalpa ho Sentru Saúde bele halo kontaktu ho inan isin rua ho di’ak liután. Tanba ne’e gosta duni programa ida-ne’e tanba simples no matenek, maske uza teknolójia maibé la’ós teknolójia kumplikadu, la presiza Wifi no internet,” nia dehan.

Nia dehan, bele halo ligasaun ho telefone baibain entre pesoál saúde ho inan isin-rua no programa ne’e hetan fundu hosi Governu Australia hahu hosi 2015-2021 hamutuk millaun $7. 

Tinan ida-ne’e, programa Liga Inan sei iha faze tranzisaun ba Ministériu Saúde (MS) nian no MS kumpre duni hodi implementa programa Liga Inan ne’e.

Entretantu, Prezidente Autoridade Munisípiu Dili, Gaspar Soares hatete liuhosi programa Liga Inan atu hasa’e inan isin-rua nia konesimentu kona-ba oinsá bainhira atu tuur ahi.

“Programa lansamentu Liga Inan ne’e nia objetivu atu oinsá fó konesimentu no oinsá atu fasilita ita-nia inan no feton iha periódu isin-rua nia-laran bainhira to’o tuur ahi,” Prezidente Autoridade Munisípiu Dili hateten.

Gaspar hatutan, liuhosi programa Liga Inan ne’e, bele mós halo redusaun ba mortalidade inan isin-rua iha Timor-Leste.

“Ho nune’e, ita bele prevene no hasees hosi situasaun difísil nia-laran, entaun liuhosi ida-ne’e mak sai objetivu fundamentu ba programa Liga Inan no bele redús númeru mortalidade inan isin-rua iha ita-nia rain,” Gaspar hateten.

Biban ne’e, nia dehan, Munisípiu Dili hakarak agradese ba Guvernu Australia no parseiru sira-ne’ebé implementa no konkretiza.

Totál inan isin rua iha territóriu Timor-Leste iha 2013 to’o agora, ne’ebé hahú lansa programa liga inan ne’e iha Manufahi no inan isin-rua ne’ebé mak rejistu iha fasilidade saúde hamutuk 78.099 no inan isin-rua ne’ebé mak tuur ahi mak 45.886. Mensajén ne’ebé fasilidade saúde fó ba inan isin rua hamutuk 4.269.500.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here