Ministru Asuntu Kombatente Libertasaun Nasionál, Julio Sarmento da Costa ‘Meta Mali’. Imajen TATOLI/Egas Cristóvão

DILI, 25 fevereiru 2021 (TATOLI)—Primeiru-Ministru (PM), Taur Matan Ruak, konvoka enkontru ho Ministru Asuntu Kombatente Libertasaun Nasionál (MAKLN), Julio Sarmento da Costa ‘Meta Mali’, no Sekertáriu Estadu ba Asuntu Kombatente Libertasaun Nasionál no Veteranu, Gil da Costa Monteiro ‘Oan Soru’, hodi ko’alia kona-ba transferénsia serbisu Komisaun Omenajen ba Konsellu Kombatete Libertasaun Nasionál (KKLN) atu asegura veteranu sira.

“Ami ko’alia ho Primeiru-Ministru, tanba Konsellu Kombatente Libertasaun Nasionál hamriik ona, maibé Komisaun Omajen sei hala’o hela serbisu, tanba ne’e atu entrega ona kompeténsia relasiona ho asuntu veteranu nian,” Ministru Meta Malik, hateten iha Palásiu Governu, kinta ne’e.

Iha kestaun ne’e, Xefe Governu mak iha kompeténsia atu deside halo transferénsia atividade Komisaun Omenajen ba KKLN atu tau matan no rezolve problema veteranu.

“Ami prepara, nune’e Primeiru-Ministru bele foti medida ho maneira halo despaisu ruma kona-ba Komisaun Omajen hodi entrega resposabilidade ba Konsellu Veteranu,” nia akresenta.

Biban hanesan, Prezidente KKLN, Vidal de Jesus ‘Riak Leman’, hateten Governu presiza duni halo transferénsia serbisu Komisaun Omenajen nia ba KKLN.

“Ami husu atu trata transferénsia atividade Komisaun Omenajen ba Konsellu Veteranu, tanba bainhira halo ona tranférensia no iha ona atividade ba komisaun instaladora, maka mandatu Komisaun Omenajen mós sei ramata,” nia hatutan.

Bainhira komisaun iha ona podér, ninia knaar maka atu rezolve problema veteranu sira, hahú hosi ukun-an to’o agora, liu-liu problema veteranu sira ne’ebé hosi ai-laran no integra ba família, dalaruma rai no sasán laiha inklui oan kiak no faluk sira.

“KKLN seidauk halo atividade ruma tanba Komisaun Omenajen seidauk entrega podér ba sira atu foti dadus veteranu, oan ki’ak no faluk sira ne’ebé to’o agora nia kondisaun moris seidauk di’ak. Ami-nia hakarak veteranu, oan kiak no faluk sira tenke hetan uma dignu, asesu ba edukasaun liuhosi bolsu estudu,” Prezidente komisaun tenik.

Iha 2020, KKLN realiza ona Asembleia Jerál Konsellu Veteranu no iha momentu ne’ebá konsege aprova planu estratéjiku, bandeira inklui logo Konsellu Nasionál Veteranu ho rejimentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here