Prokuradór Jerál Repúblika, José da Costa Ximenes. Imajen Tatoli/Egas Cristovão

DILI, 25 fevereiru 2021 (TATOLI)—Prokuradór Jerál Repúblika (PJR), José da Costa Ximenes, konvida Prezidente Parlamentu Nasionál, Deputadu Aniceto Longuinhos Guterres Lopes, atu inaugura edifísiu Prokuradoria Repúblika Lospalos nian iha fulan-abríl tina ne’e.

Edifísiu Prokuradoria Repúblika Lospalos ne’e ninia jurizdisaun perténsia ba Prokuradoria Distritál Baucau nian.

“Agora daudaun ami halo hela obra ida iha Lospalos kona-ba Prokuradoria Repúblika ida iha Lospalos ne’ebé tama iha área jurizdisaun Baucau nian. Tanba ne’e mak ha’u mai husu Prezidente Parlamentu Nasionál halo hela inaugurasaun ba edifísiu ne’e iha fulan-abríl nia laran,” Prokuradór Jerál Repúblika José da Costa Ximenes, informa ba jornalista sira, hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, iha Parlamentu Nasionál, kinta ne’e.

Nia dehan, ajenda tentativa ba inaugurasaun ne’e sei hala’o iha fulan-abríl tinan ida-ne’e tanba oras ne’e obra atinje ona 50%.

“Ita hatene katak tinan barak nia laran, maluk sira hosi Tutuala, Luro, Iliomar, tenke hakat to’o Baucau para bele hetan prosesu julgamentu. Entaun Prokuradoria Jerál konsege konklui ona. Obra ne’e ita hahúiha setembru 2020 no agora atinje ona 50%, besik termina ona. Iha fulan-abríl nia laran bele inaugura ona,” nia dehan.

Prokuradór Jerál Repúblika ne’e fó-sai katak, edifísiu ne’e gasta orsamentu rihun $710-resin ho rai ninia luan 4500m2.  

Edifísiu foun Prokuradoria Repúblika ne’ebé lokaliza iha Munisípiu Lautem ne’e komposta hosi  sala formasaun naruk metro 28X10 no kompleta ho rezidénsia ba prokuradór ofisiál sira-nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here