PDHJ ho Estrela+ asina akordu kooperasaun iha area protesaun direitu umanu, kinta (25/02). Imajen Tatoli/Nelson dos Santos

DILI, 25 fevereiru 2021 (TATOLI)-Provedoria Direitu Umanu no Justisa (PDHJ) ho Organizasaun La’ós Governu nian (ONG) Estrela+ Timor-Leste,  kinta ne’e,  asina  akordu kooperasaun servisu relasiona ho polítika kona-ba protesaun no promosaun ba direitu umanu iha instituisaun públiku no mós ba komunidade sira.

Akordu kooperasaun ba periodu tinan rua; 2021-2023, asina diretamente hosi Provedora Jesuína Maria Ferreira Gomes ho Diretora  Ezekutiva Estrela+ Timor-Leste, Ines Sarmento Lopes, iha edifísiu PDHJ, Dili.

Akordu kooperasaun ne’e define parte sira sei hala’o atividade dezenvolve planu asaun sira kona-ba formasaun ba instituisaun PNTL, F-FDTL, Guarda Prizionál, pesoál saúde, organizasaun populasaun xave, sosiedade sivíl no entidade ka  ajénsia públika sira seluk hodi inkorpora ajenda kona-ba matéria papél PDHJ, inklui direitu umanu, governasaun di’ak, prosesu simu keixa, orientasaun seksuál, identidade jéneru, espresaun no karakterístika seksuál SOGIESC, estigma no diskriminasaun ba pesoál ne’ebé afetadu hosi HIV/SIDA no populasaun save sira.

PDHJ nu’udar organizasaun independente ida ne’ebé  iha knar atu haree no buka hatán sidadaun sira-nia problema  hasoru podér públiku, hodi haree loloos hahalok sira-ne’e tuir lei ka lae no halo prevensaun no hahú prosesu tomak hodi haburas fali justisa.

PDHJ uza nia podér Konstitusionál atu promove no próteze  direitu umanu hodi estabelese Estadu direitu ne’ebé efetivu  atu promove kultura efisiénsia, transparénsia, integridade no mós responsabilidade ba entidade tomak, ba órgaun públika no mós ba setór privadu.

Estrela+ nu’udar  Organizasaun La’ós Governu nian  ida hala’o kna’ar tuir nia misaun no atribuisaun sira hanesan halo advokasia ba direitu, kuidadu no suporta grupu marjinalizadu mak hanesan ema sira ho  HIV/SIDA no grupu lézbika, gay, biseksuál, transjender no intersex (LGBTI) bazeia ba sira-nia orientasaun seksuál, identidade jéneru no espresaun no karakterístika seksuál (SOGIESC) no próteze sira hosi atividade prinsipál sira hanesan asesu ba justisa, fasilidade saúde, direitu asesu ba edukasaun no servisu no direitu hetan tratamentu hanesan ema bai-bain iha sosiedade ho livre.

Iha diskursu, Provedora Jesuína Maria Ferreira Gomes, hateten ho nota entendimentu parte rua  sei servisu hamutuk ho di’ak liután hodi  hala’o formasaun, workshop, semináriu, sosializasaun ba entidade sira ne’ebé identifika ona ho nia alvu  oinsá hasa’e koñesimentu no mós konsiénsia kona-ba promosaun no protesaun direitu umanu  iha sosiedade, liu-liu maluk  marjinalizadu.

Nia hateten, papél sosiedade sivíl importante servisu hamutuk ho entidade públika hodi halo promosaun, protesaun no hakonu sidadaun sira nia direitu.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here