Ekipa Médiku hala’o hela servisu hodi evakua pasiente COVID-19 iha Aldeia Klauhalek, Suku Belulik Leten, Postu Administrativu Fatumean, Munisípiu Covalima, ne’ebé pozitivu COVID-19. Imajen Tatoli/Eugénio Pereira

COVALIMA, 25 fevereiru 2021 (TATOLI) – Ministériu Saúde ho Sala Situasaun Sentru Integradu Jestaun Krize (SS-CIGC) haruka ekipa médiku na’in-rua kompostu parteira feto ida no médiku mane ida submete konfinamentu obrigatóriu ka kuarentena iha a Covalima, tanba halo komunikasaun direita pasiente ida pozitivu COVID-19.

Médiku na’in-rua, kinta ne’e, purvolta  tuku 9:30 Otl, evakua hosi sira-nia hela fatin Fatumean ba Covalima tula direita hosi Ambulánsia Multifunsaun ida hodi lori ba teste screening COVID-19 atu bele halo analiza ba sira nia kondisaun saúde.

Notísia Relevante : Kazu konfirmadu foun ida tan hosi Fatumean

Xefe Sentru Saúde Komunitáriu Fatumean, Agostinho Amaral rekoñese médiku na’in-rua ne’e halo kontaktu direita ho inan isin-rua ne’ebé durante ne’e halo konsulta iha Sentru Saúde Fatumean.

Inan isin-rua ne’e pozitivu COVID-19, hafoin ekipa halo screening COVID-19 iha loron 20 fevereiru 2021 no rezulta laboratóriu fó sai pozitivu COVID-19 no evakua ona hosi Fatumean ba Sentru Izolamentu Dili.

Médiku sira-ne’e konkorda hodi hela iha kuarentena hodi halo teste ba sira-nia kondisaun saúde hodi evita transmisaun lokál surtu COVID-19 ba sira nia família no abitante sira.

Ekipa médiku sira seluk ne’ebé destaka iha Fatumean kontinua halo asaun tama sai komunidade sira-nia uma hodi halo screening no investigasaun kle’an para evita transmisaun lokál.

Ekipa vijilánsia epidemiolojia ho ekipa laboratóriu, nafatin buka tuir kontaktu sira hodi halo análize ba sira-nia amostra.

Haree hosi nivél alerta no resposta ne’ebé Governu Timor-Leste adopta ba prevensaun no metigasaun COVID-19 iha Timor-Leste, hahú loron 23 fevereiru 2021, Timor-Leste tama fali faze ne’ebé hanaran ALERTA 3 ka faze ‘’metigasaun’’. Serka Sanitária sei mantein nafatin, tuir rezolusaun Governu nº4 & nº5, 15 Fevereiru 2021.

Ekipa SS-CIGC kompostu hosi PNTL ho F-FDTL no   médiku sira mós alerta nafatin ba populasaun Fatumean atu mantein kalma, labele pániku, no buka kumpre nafatin regra saúde públiku.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here