Ministru Asuntu Kombatente Libertasaun Nasionál, Julio Sarmento da Costa ‘Meta Mali’. Imajen TATOLI/Egas Cristóvão

DILI, 25 fevereiru 2021 (TATOLI)—Ministériu Asuntu Kombatente no Libertasaun Nasionál (MAKLN) prevee ona osan $300.000 iha orsamentu tinan ne’e, hodi halo reabilitasaun fatin Konsellu Kombatente Libertasaun Nasionál (KKLN) iha eis edifísiu Arte Moris, Comoro, Dili.

“Tempu badak orsamentu sei transfere atu ezekuta reabilitasaun edífisiu Konsellu nian,” Ministru Asuntu Kombatente Libertasaun Nasionál, Julio Sarmento da Costa ‘Meta Malik’, informa iha Palásiu Governu, kinta ne’e.

Antes ne’e, Prezidente Repúblika, Francisco Guterres ‘Lú Olo’ no Primeiru-Ministru, Taur Matan Ruak, deside ona KKLN okupa edifísiu Arte Moris iha Comoro.

Governante ne’e konsidera presiza halo reabilitasaun tanba fatin ne’e luan no iha salaun tolu.

“Presiza duni halo reabilitasaun fazeadamente hodi sai edifísiu própriu ba konsellu atu halo serbisu ho di’ak,” nia akresenta.

Biban hanesan, Prezidente KKLN, Vidal de Jesus ‘Riak Leman’, hateten  daudaun konsellu hein de’it transferénsia orsamentu atubele hahú ona reabilitasaun edifísiu.

“Ami atu hadi’a edifísiu Arte Moris no ministériu atu entrega ona osan $300.000, maibé seidauk transfere, tanba ne’e seidauk hahú reabilitasaun,” nia akresenta.

Iha  tinan ne’e, Governu liuhosi MAKLN aloka orsamentu $900.000 ba KKLN atu ezekuta programa no planu estratéjiku sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here