Logotipu JSMP

DILI, 25 fevereiru 2021 (TATOLI)-Programa Monitorizasaun  Sistema Judisiál (JSMP) durante dezembru 2020 to’o fevereiru 2021 realiza ona formasaun ba iha Ofisiál Polísia Suku (OPS) no Konsellu Polisiamentu Komunitáriu (KPK) ho tópiku “Papél KPK no OPS iha prevensaun violénsia bazeia ba jéneru”.

Treinamentu ne’e kobre ona munisípiu haat, kompostu hosi Manatuto, Bobonaro, Ermera no Aileu ho totál partisipante membru OPS hamutuk na’in-80 no  membru KPK hamutuk  na’in-44.

Notísia Relevante : JSMP kontinua fó formasaun demokrasia no asesu justisa formál

Iha treinamentu ho durasaun loron ida ba kada treinamentu ne’e espesífiku fahe ba sesaun haat (4), sesaun dahuluk kona-ba konseitu krime ne’ebé ko’alia liu kona-ba saida mak krime, tipu krime, responsabilidade kriminál, natureza krime no ajente sira iha krime, preskrisaun ba keixa no pena.

Iha sesaun kona-ba prosesu justisa formál ne’ebé refere liubá prosesu inkéritu, julgamentu, rekursu no aplikasaun pena.  Entretantu, iha sesaun datoluk kona-ba violénsia bazeia ba jéneru ne’ebé refere liubá iha konseitu no asaun iha violénsia bazeia ba jéneru, enkuadramentu legál iha violénsia bazeia ba jéneru, konseitu violénsia doméstika no mós ligasaun ho violénsia bazeia ba jéneru. Iha sesaun dala ikus maka ko’alia kona-ba papél OPS no KPK ba iha prevensaun no kombate krime liuliu iha violénsia bazeia ba jéneru.

Iha treinamentu ne’e, fasilitadór sira responde no klarifika pergunta sira husi partisipante sira ne’ebé kestiona liu kona-ba tipu krime sira ne’ebé sira bele rezolve no taka liuliu razaun tanbasá krime ho natureza violénsia doméstika la bele taka. Aleinde ne’e, polísia OPS sira mós husu mezmu krime públiku la bele taka maibé oinsá sé entre suspeitu ho vítima hakarak atu rezolve sira nia problema liuhusi justisa tradisionál no saida mak sira sei halo bainhira suspeitu sira iha krime ruma lakohi atu ko’alia ho loloos ba kualkér sira nia asaun durante investigasaun. Pergunta no preokupasaun sira ne’e fasilitadór sira responde no klarifika kedas.

“Treinamentu ne’e pertinente tanba bele responde kedas sira nia dúvida no pergunta sira nune’e bele hasa’e sira-nia koñesimentu kona-ba prosedimentu kriminál, liuliu diferensa entre krime públiku no semi públiku no sira-nia papél iha prevensaun  violénsia bazeia ba jéneru,” diretora ezekutiva JSMP, Ana Paula Marçal dehan liuhosi nota imprensa  ne’ebé TATOLI asesu hosi JSMP, kinta ne’e.

Durante treinamentu JSMP observa liuhosi avaliasaun ba iha formuláriu antes treinamentu no hafoin treinamentu katak, partisipante barak konkorda katak iha kazu hotu, KPK ka OPS bele konkorda ho vítima bainhira sira hakarak rezolve de’it iha família ka taka tiha prosesu, maibé hafoin treinamentu muda duni númeru resposta ne’ebé loos ba pergunta refere.

Partisipante kompriende kle’an tópiku sira ne’ebé mak kobre iha treinamentu no husu atu kontinua hala’o mós ba ajente Xefe PNTL nian atu sira mós bele iha komprensaun hanesan nune’e bainhira fó orden tuir duni lei.

Programa ida ne’e finansia husi Embaixada Nova Zelándia iha Timor-Leste liuhosi The Asia Foundation (TAF) Programa Apoiu Polisiamentu Komunitáriu (PAPK). Treinamentu hanesan sei realiza iha Munisípiu Manufahi ba estrutura KPK.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here