Prezidente Autoridade Munisípal Dili, Gaspar Soares. Imajen/Tatoli

DILI, 25 fevereiru 2021 (TATOLI)–Prezidente Autoridade Munisípiu Dili, Gaspar Soares, hateten ambiénte moos no saudável tenke iha partisipasaun no suporta hosi komunidade. 

“Ami Munisípiu Dili, iha kompromisu no esforsu makaas hodi kontrollu no jere lixu ho di’ak iha sidade laran, maibé presiza komunidade nia suporta no partisipasaun ba ambiente moos no saudável,” Gaspar Soares hateten ba jornalista sira, hafoin ramata lansamentu programa Liga Inan iha Sentru Saúde Kampung Baru, Dili, kinta ne’e.

Nia dehan, bainhira iha planu no programa di’ak maibé komunidade laiha konsiénsia atu suporta ba programa ne’ebé Governu traxa mak programa la’o ladún di’ak.

“Tanba realidade ne’ebé ita halo liuhosi sensibilizasaun haleu Sidade Dili no ita to’o ba iha aldeia, maibé barak mak seidauk iha konsiénsia no balun mós komprende no iha hanoin tau lixu iha nia fatin ona,” nia dehan.

Gaspar hatutan, dala barak komunidade soe lixu la tau fatin apropriadu hodi soe iha mota laran, dalan públiku inklui soe iha merkadu laran.

Entaun, nia hateten, ho atetude hirak ne’e mak nia konsekuensia hamosu moras oioin mak hanesan dengue ne’ebé mak hamete labarik na’in hitu iha 2020 no 2021 labarik ida mak mate.

“Ita iha dekretu-lei númeru 33/2008, 20 agostu, kona-ba ijiéne. Dekretu-lei ne’e hateten labele butuk foer iha dalan ninin no labele soe foer arbiru maibé komunidade kontinua soe arbiru iha dalan-dalan,” nia afirma.

Tuir nia, ho dekretu-lei ne’e mak kualker sé de’it mak la kumpre no konsidera hanesan kontra ordenasaun mak nia sei hetan sansaun multa hosi $5-$15. Karik iha infratór ka ema-ne’ebé kontra regra no identifikadu hanesan koletivu mak nia sei multa dobru.

To’o agora, Governu seidauk aplika dekretu-lei númeru 33/2008 ba komunidade, tanba sei iha lei balun ne’ebé hateten atu aplika dekretu-lei ne’e mós presiza haree ba ekonómia komunidade ne’e nian.

“Bainhira aplika multa ne’e presiza iha padraun ida-ne’ebé mak klaru. Katak, ema ida-ne’ebé mak bele hetan $5 no ida ne’ebé mak hetan $10. Tanba ne’e mak presiza padraun ida define klaru no loos para ita bele aplika ba komunidade,” nia dehan. 

Tanba tuir nia, bainhira implementa ona dekretu-lei ne’e, komunidade labele kestiona fali multa sira-ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here