Traballadór timor-oan hosi Austrália tuun hosi Aviaun Qantas iha Aeroportu Comoro, kuarta ( 24/02). Imajen TATOLI/António GonçalvesP

DILI, 24 fevereiru 2021 (TATOLI)-Traballadór timor-oan na’in-10 ne’ebé serbisu iha Austrália fila hikas mai Timór, ne’ebé to’o iha Aeroportu Internasionál Prezidente Nicolau Lobato, Comoro, Dili, iha kuarta (24/02) iha tuku 12:25, ho aviaun Qantas.

“Traballadór sira ne’ebé repatria, loloos ne’e tuir lista ne’ebé ha’u simu 12 maibé rua kansela,” Adidu Traballu Sekretaria Estadu Formasaun Profisionál no Empregu (SEFOPE) ba Austrália, Tomas de Araújo, informa ba Agência TATOLI iha Aeroportu Comoro, kuarta ne’e.

Traballadór hirak ne’e balun ba Austrália iha tinan 2020, ne’ebé entre sira iha feto na’in-ida mak ho kondisaun grávida no seluk mesak mane de’it.

“Sira fila hikas mai tanba balun kontratu ramata, balun saudades ho família no hakarak fila mai Timór, maibé sira kumpre kontratu no empregadór hakarak sira kontinua maibé sira lakohi no deside fila mai Timór,” nia akresenta.

Notísia relevante: Hafoin ratifikasaun akordu, aban aviaun Qantas voo dahuluk mai Timor-Leste

Tuir Adidu, traballadór sira hirak ne’e sei kumpre medida prevensaun COVID-19 nune’e ekipa Ministériu Saúde sei lori ba tau iha fatin kuarentena iha Tibar.

Traballadór timor-oan hosi Austrália to’o iha Aeroportu Comoro, kuarta (24/02). Imajen TATOLI/António Gonçalves

Bazeia ba diploma ministeriál, durante traballadór sira kumpre kuarentena iha Timór Governu mak sei responsabilidade.

Tuir observasaun Agência TATOLI iha terrenu nota katak traballadór sira ne’e bainhira tuun iha Aeroportu Comoro hetan kedan dezinfeta inklui sasán sira hosi ekipa Ministériu Saúde no kumpre medida prevensaun hanesan tau máskara.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here