DILI, 24 fevereiru 2021 (TATOLI)—Inspesaun Jerál ba Traballu (IGT, sigla portugés) hosi Sekretaria Estadu Formasaun Profesionál no Empregu (SEFOPE) iha tinan 2010 to’o 2020 rejista kazu traballadór hetan asidente to’o mate iha serbisu fatin hamutuk 17.
“Ami labele fó sai kompañia nia naran, ne’ebé traballadór sira serbisu ba to’o hakotu vida, tanba hanesan segredu institusionál no liga ba profisionál serbisu. Kuandu ami fó sai naran kompañia, sira bele claim fali ami,” Inspetór Jerál Traballu, Rofino Lopes dos Reis, informa ba Agência TATOLI, iha ninia knaar fatin, Hudi-laran, kuarta ne’e.
Notísia relevante: Traballadór timor-oan ida hakotu iis durante sebisu konstrusaun
Iha tinan 2020 nia laran, IGT rejista kazu asidente iha serbisu fatin hamutuk 14.
Inspetór Traballu ne’e dehan, maski iha Timor-Leste seidauk iha lei atu fó indemnizasaun kuandu traballadór mate iha lokál traballu, maibé IGT halo negosiasaun ho parte kompañia no konsege responsabiliza traballadór ne’ebé mate durante hala’o knaar.
“Bainhira traballadór ida klosan no serbisu ona durante fulan-neen to’o tinan-ida ka to’o tinan-tolu, maka nia mate iha asidente traballu, ita sei haree ba ninia klasifikasaun atu hetan indemnizasaun, ami halo negosiasaun ho kompañia kiik liu $6.000,” nia informa.
Enkuantu, traballadór ida hanesan kaben-na’in maibé oan laiha $7.000 no traballadór kaben-na’in no iha ona oan bele hetan to’o $9.000.
“Ida-ne’e maka durante ne’e ami aplika ba kompañia no kuaze kompañia sira kumpre hotu,” nia akresenta.
Jornalista: Natalino Costa
Editora: Julia Chatarina
