Ekipa Vijilánsia Ministériu Saúde halo servisu iha Postu Administrativu Fatululik, Covalima. Imajen Tatoli/Eugénio Pereira

DILI, 24 fevereiru 2021(TATOLI)—Governu liu hosi Sala Situação Centro Integrado Gestão de Crises (SS-CIGC sígla portugés) re-integra tan pasiente COVID-19 rekoperadu na’in-neen ba família.

Novidade ne’e fó-sai hosi Koordenadór Forsa-Tarrefa ba Prevensaun no Mitigasaun Surtu COVID-19 iha Timor-Leste, Rui Maria de Araújo iha Centro Convenções Dili (CCD).

Notísia Relevante:Pasiente pozitivu COVID-19 iha Fatumean aumenta tan rua

“Ita-nia pesoál saúde re-integra tan pasiente na’in-neen ba família, na’in-lima hosi sala izolamentu Vera Cruz no na’in-ida hosi sala izolamentu iha Rejiaun Administrativa Espesiál Oe-cusse Ambeno,’’ Doutór Rui Araújo hateten ba jornalista sira liuhosi konferénsia imprensa.

Médiku ne’e esplika, grupu ne’ebé tama iha loron 20 janeiru 202, ekipa laboratóriu halo teste tuituir-malu negativu no ohin fó sai ba públiku katak, na’in neen re-integra ba família.

Tanba ne’e, kazu ativu ne’ebé baixa iha sala izolamentu Vera Cruz hamutuk 21 no totál ema iha kuarentena hamutuk 289.

“Ema iha kuarentena sa’e ba 289 tanba, ohin ema tama hosi Aeroportu Internasionál Nicolau Lobato hamutuk na’in  54.  Trabalhadór na’in 15 fila hosi Bayu Undang no ema na’in 39 mai hosi Austrália,” nia hateten.

Ho situasaun ne’e, Koordenadór Forsa-Tarefa ba Prevensaun no Mitigasaun Surtu COVID-19 apela ba komunidade iha fronteira atu labele hakat ba-mai, tanba Timor-Leste iha ona transmisaun komunitária.

SS-CIGC  mós apela ba komunidade ho líder komunitária sira, bainhira hatene ema ruma ne’ebé halo viajen hakatliu fronteira ba nasaun seluk, no fila mai la aprezenta aan atu tama kuarentena, favór informa ba autoridade polísia ho pessoál saúde, atu bele lori ema ne’e ba kuarentena.

Husu mós ba populasaun tomka, hosi evidénsia ne’ebé iha, maski transmisaun lokál ne’e sei restritu iha Suku Belulik Leten, Fatumea, maibé tenki alerta nafatin hodi prátika ho disiplina utilizasaun máskara, medida ijiene pesoál, distansiamentu fiziku no evita halibur-malu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here