Produtu Cesta Bázika iha bote-laran Imajen TATOLI/Antónia Gusmão

DILI, 24 fevereiru 2021 (TATOLI)—Sekretaria Estadu Ambiente (SEA) kontribui ona pasta verde no bote ne’ebé sosa direta hosi populasaun, ho kuantidade millaun 1,4 ekivalente 90% ba implementasaun programa Cesta Bázika.

“Ami-nia responsabilidade iha embalajen saku verde no bote, ne’ebé ita organiza populasuan sira atu prodús atu ita hola fali hamutuk millaun 1,4, ne’ebé ita gasta ona osan diretu ba populasaun hamutuk $250.000. Espera natoon ona hodi halo distribuisaun Cesta bázika,” Sekretáriu Estadu Ambiente, Demétrio do Amaral de Carvalho, hateten ba Agência TATOLI, iha City 8, Has-laran, Dili, kuarta ne’e.

Programa Cesta Bázika envolve liña ministeriál, ne’ebé kada ministériu hetan alokasaun orsamentu ho tarefa ne’ebé define ona.

SEA hetan alokasaun orsamentu hamutuk millaun $1-resin no simu responsabilidade mobiliza produtór embalajen atu prodúz saku verde ho modelu tolu hanesan produtu lokál (bote), produtu resiklajen (kaixa) no saku verde ka biodegradável ne’ebé sei sosa hosi empreza lokál Sira.

Embalajen sei sosa iha munisípiu tomak, ne’ebé kada bote ho folin $1,50 no kaixa resiklajen ne’ebé sosa hosi grupu joven kreativu sira ho folin $1, atu tau produtu ne’ebé sei distribui ba komunidade.

Tuir Sekretáriu Estadu ne’e, bainhira orsamentu ne’ebé aloka ba SEA la gasta hotu maka sei transfere fali ba kofre Estadu.

“Ami gasta la hotu tanba iha adisionál $80.000 inklui osan ba viajen lokál ami la gasta hotu, ne’ebé osan ne’e fila ona ba kofre Estadu,” nia akresenta.

Kona-ba koa’ orsamentu 7%, governante ne’e konfesa, SEA nia kondisaun finanseira ki’ik tebes ho totál millaun $2,9, ne’ebé fó kontribuisaun de’it 5%.

Entretantu, implementasaun programa Cesta Básika faze daruak ne’ebe hahú iha  janeiru to’o fevereiru la’o normál, ne’ebé kuantidade distribuisaun ba populasaun iha territóriu hamutuk 810,103 (ekivalente 62.31%)  hosi totál benefisiáriu milaun 1,5.

Ministériu implementadór sira hanesan Ministériu Turizmu, Komérsiu no Indústria (MTKI) atinje ona 40,5%, Sekretariu Estadu Kooperativa (SEKoop) 73,9%, Ministériu Agrikultura no Peska  (MAP) 88,4% , no Sentru Lojístiku Nasionál (CLN, sigla portugés) 58,5%.

Programa Governu kurtu prazu iha ámbitu rekuperasaun ekonómika ne’e, nu’udar medida  restrisaun iha   luta kontra surtu COVID-19, hodi salva no proteje funsionamentu ekonomia rai-laran.

Ho objetivu hodi kria kondisaun liuhosi aumenta rendimentu  agrikultór,  inklui apoia família ho nesesidade bázika hodi kombate hamlaha liuhosi kontribuisaun alimentar  ne’ebé iha nutrisaun ba uma kain hotu iha Timór laran.

Entretantu, Ministériu Koodenadór Asuntu Ekonómiku (MKAE) kontinua enkoraja ba ajente fornesedór sira atu kumpre regra ona halo manipulasaun ba presu sasán ne’ebé define hamutuk ona.

Medida apoiu família sira liuhosi programa  Governu, ho ninia perspetiva hodi estímulu ekonomia rai laran ba períodu kurtu prazu, bazeia ba dekretu-lei  númeru 48/2020, 07 outubru kona-ba adota medida apoiu família liuhosi atribuisaun Cesta Bázika hosi operadór ekonómiku lokál sira iha ámbitu planu rekuperasaun ekonómika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here