DILI, 24 fevereiru 2021 (TATOLI)–Sekretáriu Estadu Ambiente (SEA) liuhosi Diresaun Jerál Ambiente, organiza formasaun tema sentrál ‘haforsa no hametin kapasidade servisu atendimentu públiku hodi asegura no garante boa governasaun ambientál iha Timor-Leste’, liuliu garante ezekusaun orsamentu ho kualidade.
Atividade formasaun ne’e hetan apoia hosi projetu CCCD/UNDP durante loron rua, hahú iha loron 24 to’o 25 fevereiru iha City 8 Maleuana, Canossa Has-laran.
“Ami-nia persentajen ezekusaun orsamentu iha tinan 2020 hamutuk 99%, ita hakarak la’ós persetajen ezekusaun orsamentu de’it mak di’ak maibé kualidade ezekusaun no organiza sira ho di’ak tanba ne’e mak ita halo treinamentu,” Sekretáriu Estadu Ambiente, Demétrio do Amaral de Carvalho, informa ba Agência TATOLI, kuarta ne’e.
Formasaun ne’e ba kargu xefia iha planeamentu no ferramente sira ne’ebé atu asegura ezekusaun implementasaun tuir prinsípiu boa governasaun no prinsípiu igualdade jéneru inklui ferramenta ba monitorizasaun no avaliasaun.
Daudaun ne’e, Governu aplika ona orsamentu bazeia ba programa ho intensaun atu dezenvolve liután orsamentu bazeia ba dezempeñamentu pesoál sira.
“Ita ko’alia kona-ba orsamentu bazeia ba dezempeñu, ita la koa’lia persentajen ezekusaun annuál, maibé ita ko’alia kualidade ezekusaun kada atividade no programa,” nia akresenta.
Kona-ba kualidade ezekusaun, tuir Sekretaria Estadu ne’e, kada atividade no programa sei iha resposabilidade to’o nível pesoál kargu xefia ho ninia indikadór dezempeñu ne’ebé atinje iha área ne’ebé lidera.
Nune’e, governante ne’e husu ba Diretór no Xefe Departamentu sira hodi partisipa treinamentu ne’e tanba hanesan reflesaun hodi koko jere halo di’ak ferramenta planeamentu ne’ebé ho loloos ho baze orsamentu ba programa.
“Ha’u-nia hanoin, kargu xefia sira bele halo revizaun ba termu referénsia ba kada pesoál, karik uluk ne’e jerál liu. Ha’u espera hafoin treinamentu ne’e sira hatene ona resposabilidade ba indikadór dezempeñu no mós funsaun pesoál sira,” nia hatutan.
Jornalista: Florêncio Miranda Ximenes
Editora: Julia Chatarina