Ministru Finansa, Rui Augusto Gomes. Imajen TATOLI/Egas Cristóvão.

DILI, 24 fevereiru 2021 (TATOLI)—Ministru Finansa (MF), Rui Augusto Gomes, informa ba reprezentante povu iha uma fukun Parlamentu Nasionál katak informasaun ne’ebé espalla kona-ba Banku Federál Amérika la transfere osan ne’e boatu tanba prosesu levantamentu ne’e bazea cash flow.

Cash flow (fluxo de caixa) ne’e refere ba fluxu osan kaixa empreza ka montante kaixa ne’ebé rekolla durante periódu ne’ebé define ona, dalaruma ligadu ba projetu espesífiku ruma.

Ministru Finansa ne’e esplika, saldu tranzitadu hosi 2020 mai 2021 ne’ebé seidauk halo rekonsiliasaun hamutuk millaun $305.

Nia hatutan, ko’alia kona-ba levanta osan hosi fundu minarai no sustentabilidade fundu ne’e ema hotu nia preokupasaun maibé levantamentu fundu minarai ne’e halo bazea ba chas flow signifika katak bainhira Governu presiza osan mak foin halo levantamentu.

Ministru Rui Gomes fó ezemplu iha projesaun OJE 2019 atu foti biliaun $1,196,400 maibé foti de’it millaun $969, signifika husik hela millaun $227 iha konta iha li’ur nune’e funan boot ho retornu ne’ebé di’akliu.

“Sustentabilidade fundu petrolíferu ida-ne’e preokupasaun ita hotu nian tanba ne’e mak ita halo ezersísiu ne’ebé boot para atu bele jere ita-nia levantamentu sira-ne’e bazea ba cash flow. Kuandu boatu ka rumoris ka osan ne’e laiha ne’e mesak boatu ne’ebé bosok,” Ministru Finansa, Rui Augusto Gomes, ko’alia iha debate Konta Jerál Estadu (KJE) 2019, iha plenária Parlamentu Nasionál, kuarta ne’e.

Nia fundamenta, osan ne’ebé sirkula daudaun iha ekonomia rai rai-laran to’o oras ne’e atinje millaun $196,300.

“Konserteza iha diferénsia entre ezersísiu iha kaixa no mós transparénsia portál. Transparénsia portál ne’e nia iha diferénsia tanba buat ne’ebé ezekuta ohin, nia só refleta aban,” Ministru Finansa argumenta.

Ministru Finansa ko’alia asuntu ne’e hodi responde ba Deputada Bankada Congresso Nacional de Reconstrução de Timor-Leste, Bendita Magno, husu Governu atu esplika klaru kona-ba levantamentu ba Banku Federál Amérika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here