Jornada téknika OJE no avaliasaun polítika públika, iha Alma do Mar Resort, iha suku Lauhata. Imajen/Mídia PN

DILI, 24 fevereiru 2021 (TATOLI)-Parlamentu Nasionál (PN) hamutuk ho programa ba Jestaun Finansa Públika no Supervizaun (PMFO) ‘osan povu nian, jere ho di’ak’ organiza sémináriu jornada téknika kona-ba ‘Orsamentu Jerál Estadu no Avaliasaun ba Polítika Públika’ atu fó kapasitasaun téknika ba pesoál hamutuk na’in-19, ne’ebé fó apoiu ba serbisu komisaun.

Atividade ne’e realiza kuaze semana ida, hahú hosi loron 22 to’o 26 fevereiru, iha Alma do Mar Resort, suku Lauhata, munisípiu Liquiçá.

“Ha’u apela ba formandu sira, atu aproveita oportunidade ho di’ak hodi hetan koñesimentu ba imi-nia an rasik no mós instituisaun,” Sekretáriu Jerál Adjuntu, João Rui Amaral, hateten liuhosi nota ne’ebé Agência TATOLI asesu, kuarta ne’e.

Semináriu ne’e iha tema prinsipál haat hanesan lei ba orsamentu no jestaun finanseira, Objetivu Dezenvolvimentu Sustentável (ODS) inklui ajenda 2030, avaliasaun polítika no análiza ba desviu orsamentál, no iha loron ikus sei diskute tópiku xave balun relasiona ho rejime jurídiku aprovizionamentu.

Jornada sira ne’e organiza hosi Asesór Parlamentar, Margarida Rodrigues, Asesór Jurídiku, António Maia no Jestór hosi Área Supervizaun Orsamentál, Daniel Goulão.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here