Membru Unidade Patrullamentu Fronteira no FALINTIL-FDTL halo seguransa másimu hodi blokeia movimentu abitante iha Aldeia Klauhalek, Suku Belulik Leten, Postu Administrativu Fatumean, Munisípiu Covalima. Imajen Tatoli/Eugénio Pereira.

DILI, 24 fevereiru 2021 (TATOLI)—Reprezenta Pontu Vogál Munisípiu Covalima, Bendito Amaral Barros, informa Komunidade Covalima atu kompre regra Estadu Emerjénsia (EE) mak presiza Polísia Nasionál Timor Lorosa’e (PNTL) involve mós iha ekipa task force ne’ebé estabelese iha Covalima.

Notísia Relevante: COVID-19 iha Fatumean, komunidade la onestu fó informasaun

Nia hatutan, objetivu ida hosi estabalese ekipa task force ne’e mak atu sensibiliza informasaun ba komunidade kona-ba regra EE nian, atu nune’e komunidade bele komprende no halo tuir. 

“Liga ho lock dawn agora, PNTL halo pasarevista ba transporte sira hanesan motór ho karreta nia-dokumentu inklui mós ema-nia kartaun identidade, atu nune bele hatene ema ne’e maihosi ne’ebé no hela iha ne’ebé. Bainhira hetan ema ruma la lori kartaun identidade sei lori ba kuarentena hodi halo teste swab (médiku),” Bendito Amaral Baroos hateten ne’ebé lee sai hosi Responsável Sentru Informasaun ba Impaktu COVID-19, Miguel da Silva Ornai, iha salaun FONGTIL, Caicoli, Dili, kuarta ne’e.

Nia hateten, pontu dahuluk mak PNTL hamosu siklu seguransa balun iha fronteira mak dahuluk halo kontrola ne’ebé hala’o hosi PNTL ho F-FDTL sira, komandante polísia ekquadra ho nia-membru sira inklui mós instutisaun Governu nian halo knaar iha fronteira.

Daruak, seguranasa kontinua halo aprosimasaun no koordenasaun ho PNTL nian, atu nune’e bele haree hamutuk ba situasaun komunidade nian relasiona ho situasaun COVID-19 iha fronteira Timor-Leste.

Datoluk, seguransa emidiata iha baze ne’ebé sei hala’o hosi Konsellu Suku inklui ho polísia OPS sira, atu nune’e se hetan ema ilegál ruma mosu iha komunidade sira-nia le’et, tenke lori kedas ba iha polísia ka autoridade lokál sira.

Aleinde ida-ne’e, nia hateten, fasilidade ba protesaun ba moras COVID-19 ne’ebé uza iha fronteira la sufisiente mak hand sanitizer, kombustivél ba transporte nian, inklui transporte ne’ebé nia kondisaun sei di’ak mak hela rua, kompas, binoklu, mapa, no lampda laiha.

“Ida-ne’e mak rezultadu konfirmasaun FONGTIL Covalima ho Diretór Servisu Saúde Munisípiu Covalima nian iha fronteira ne’ebá,” nia informa.

Iha Covalima, nia relata, ba servisu saúde nian liga ba situasaun COVID-19 nian, pesoál saúde sira fahe infomasaun beibeik ba komunidade no prepara fatin kuarentena ba ema sira-ne’ebé mak hetan sintoma ka ba ema sira tama sai ilegál iha fronteira.

“Karik polísia kaer sira tenke lori ba iha kuarentena, liu loron tolu halo teste ba sira, no loron tolu antes sira sai karik halo teste ne’e mak balu hetan sintoma ruma, ita lori ba iha fatin kuarentena, depois hein rezultadu teste tuir mai. Agora iha teste masál hala’o ona iha área fronteira hanesan Postu Administrativu Fatumea, Fatululik, Fohorem Maucatar no Tilomar,” nia relata.

Liuhusi teste masáll hatudu iha Postu Fatumea hetan ona sintoma balu iha ema na’in-neen pozitivu COVID-19 iha Aldeia Klauhalek, Suku Belulik Leten, Postu Adminsitrativu Fatumea ne’ebé daudaun transporta ona mai Dili no baixa iha sala Izolamentu Vera Cruz, Dili.

Kona-ba fasilidade ba pesoál saúde sira iha Covalima, nia hateten, daudaun ne’e sufisiente atu uza hodi halo atendementu ba komunidade hanesan máskara, luvas no seluk tan.

Tuir observasaun jerál hanesan pontu vogál FONGTIL nian iha terrenu, eskola sira sei suspende hela depois lockdawn no ema halo movimentu ba mai menus, maibé parte balun atividade komunidade nian barak mak lakumpre regra EE.

“Tuir ha’u-nia observasaun komunidade sira uza máskara bainhira ba merkadu. Maibé, bainhira sira iha uma ne’e la uza máskara no laiha distánsia sosiál no mós laiha bee fase limaa iha uma oin.  Iha kioske no restaurante sira, maiória prepara bee ho sabaun iha loja oin, só ema-ne’ebé ba sosa sasán ne’e mak la preokupa ho bee no sabaun ne’ebé hatuur oha iha loja oin,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here