Ekipa Profisionál Saúde hosi SABEH hala’o Medical Outreach iha Munisípiu Baucau, hosi loron 13 to’o 16 Dezembru 2020. Imajen/Média SABEH.

DILI, 24 fevereiru 2021 (TATOLI)—Durante fulan janeiru to’o loron 24 fulan ne’e, Sentru Saúde Formoza II rejista pasiente má nutrisaun na’in 58.

“Janeiru ita halo tratamentu ba labarik tinan-lima mai kraik na’in 28 no meadu fevereiru na’in 30. Entaun, ida-ne’e problema boot ba ita atu bele hamenus númeru,’’ Koordenadór Nutrisaun Sentru Saúde Formoza II, António da Cruz hateten ba jornalista Agência Tatoli iha kna’ar fatin, kuarta ne’e.

Notísia Relevante:2020, má nutrisaun aas iha Munisípiu tolu

Pasiente hirak ne’e hetan apoiu hodi konsumu nutrisaun F75 no F100 no konsege rekopera sira-nia saúde, laiha ema ruma mate.

Nia esplika, kauza prinsipál má nutrisaun mai hosi fatór barak hanesn fatór ekonomia, ambientál, família balun prepara hahan laiha nutrisaun, balun moras infesaun mak halo labarik-sira lakohi han to’o isin-tun no seluk-tan.

Iha kazu balun, nia dehan, inan isin-rua balun ladún konsumu hahan di’ak ne’ebé fó impaktu ba labarik-sira moris-mai ho kondiasaun má nutrisaun.

Tanba ne’e, António da Cruz apela ba inan isin-rua-sira atu konsumu hahan ne’ebé iha nutrisaun atu labarik-sira dezenvolve ho di’ak iha kabun-laran no bainhira moris-mai ho kondisaun normál.

Husu mós ba inan aman-sira atu prepara hahan ne’ebé saudável ba labarik-sira ho variasaun  hanesan karbohidratu, proteina,  gordura  no minerál.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here