Ministru Finansa, Rui Augusto Gomes. Imajen TATOLI/António Gonçalves

DILI, 24 fevereiru 2021 (TATOLI)—Governu liuhosi Ministériu Finansa (MF) sei hadi’a aplikasaun regra kontabilístika hodi mellora despeza públika iha ezekusaun orsamentál ba tinan fiskál tuir mai.

Notísia Relevante: PN aprova Konta Jerál Estadu 2019

Ministru Finansa Rui Augusto Gomes, hodi VIII Governu Konstitusionál nia naran agradese ba rekomendasaun ne’ebé Kámara Konta no Komisaun C halo iha Konta Jerál Estadu  (Cdc-sigla portugés) 2019 nian.

“Atu hadi’ak liután aplikasaun regra kontabilístika hodi mellora despeza públika liuhosi kontrolu rigorozu, hasa’e efisiénsia iha utilizasaun rekursu finanseiru ba estimula kresimentu ida ke inkluzivu liu, ne’ebé orienta ba ema nu’udar sentru ba dezenvolvimentu,” Ministru Rui Gomes ko’alia iha aprovasaun KJE 2019 iha plenária, Parlamentu Nasionál, tersa ne’e.

Ministru Finansa VIII Governu Konstitusionál ne’e hateten iha ezekusaun orsamentál tinan fiskál ka tinan finanseira tuir-mai sei halo melloramentu ho progresiva.

“Ha’u fiar katak liuhosi esforsu koletivu mak ita bele alkansa buat ne’ebé mak boot. Ami konta nafatin ho apoia Parlamentu Nasionál atu nune’e ita bele alkansa duni objetivu rendimentu médiu-altu iha 2030,” nia dehan.

Nia hatutan, proposta-lei kona-ba enkuadramentu Orsamentu Jerál Estadu ne’ebé oras ne’e iha ona Parlamentu Nasionál nu’udar pasu fundamentál no desiziva ba reforma iha jestaun finansa públika, ne’ebé sei rezolve buat barak sai alvu krítika iha Konta Jerál Estadu.

Ministru Finansa ko’alia asuntu ne’e hodi fó resposta ba rekomendasaun hamutuk 23 hosi Kámara Konta iha KJE 2019 nian.

Hosi 23 rekomendasaun ne’ebé Kámara Konta hato’o ba Parlamentu Nasionál, hodi ezije Governu asegura kompletude (completude) iha Konta Jerál Estadu. Katak, presiza konsolida organizmu administrasaun públika naun-gemprezariál hotu-hotu, inklui Servisu Fundu Autónomu (SFA) no Institutu Públiku sira tenke halo kompromisu ba estadu kona-ba programa no kontratu plurianuál.

Rekomendasaun daruak mak husu mellora no kontrolu internu ba SFA sira, katak entidade hirak ne’e tenke sujeita prestasaun ba CdC até 31 maiu tinan tuir mai.

Kámara Konta rekomenda asegura kompletude  Orsamentu Jerál Estadu ho reseita (unidade, universalidade no espesífikasaun) inklui saldo rezouraria tranzitadu.

Kámara Konta husu asegura unidade tezouraria, kontrola despeza rekorrente sira, klasífika kuadru legál no utiliza reseita fundu minarai acima Rendimentu Sustentável Estimadu (RSE) ho responsabilidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here