Ministru Finansa, Rui Augusto Gomes. Imajen TATOLI/António Gonçalves.

DILI, 24 fevereiru 2021 (TATOLI)—Ministru Finansa (MF) Rui Gomes, fó-sai katak fundu rezerva kontinjénsia sei ezekuta ho rigorozu no sei la utiliza ba nesesidade ne’ebé la’ós emerjénsia.

“Kona-ba utilizasaun fundu rezerva kontinjénsia, defaktu ami komesa rigorozu liu iha parte ida-ne’e. Tanba ne’e mak fundu rezerva kontinjénsia sei la utiliza buat sira-ne’ebé mak laiha kestaun emerjénsia,” Ministru Rui Gomes, ko’alia liuhosi debate Konta Jerál Estadu (KJE) iha plenária, Parlamentu Nasionál, tersa ne’e.

Governante ne’e rekoñese durante ne’e ministériu barak hakarak uza fundu kontinjénsia tanba atu halo pagamentu saláriu ba funsionáriu.

“Ne’e indikasaun katak planeamentu ne’e mós fraku. Dalabarak ita haree ema halai hotu ba fundu kontinjénsia tanba tenke sálariu ba funsionáriu sira. Ha’u dehan, lae, tanbasá mak ita boot nia funsionáriu servisu durante tinan ida ita-boot la hatene,” nia fundamenta.

Ministru Finansa VIII Governu Konstitusionál ne’e promete sei ezekuta rezerva fundu rezerva kontinjénsia ho rigór.

Iha loron 27 janeiru 2021 liubá, Prezidente Tribunál Rekursu (PTR) Deolindo dos Santos, hateten rezultadu auditoria hosi Kámara Konta husu Governu labele foti osan hosi fundu kontijénsia tanba loloos ne’e atu responde situasaun urjénsia.

“Ha’u fó de’it ezemplu rua iha relatóriu Kámara Kontas nian maka sei iha nafatin ezekusaun orsamentu 2019 ba programa sira-ne’ebé la prevee iha orsamentu maibé foti osan hosi fundu kontinjénsia, enkuantu  lei la permite tanba lei hateten fundu kontinjénsia ne’e urjénsia la’ós para atu taka buat sira-ne’ebé la prevee iha orsamentu,” PTR hatetetn.

Prezidente Tribunál Rekursu fó-sai katak problema seluk ne’ebé Kámara Konta deskobre mak viajen estranjeiru ne’e barak.

“Tanba  kustu viajen iha tiha ona 100% maibé halo mós aditamentu ne’ebé tuir loloos labele halo,” nia dehan. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here