Funsionáriu EDTL hadi’a hela liña eletrisidade ne’ebé avaria. Imajen/Doc. Tatoli

DILI, 24 fevereiru 2021 (TATOLI)—Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, husu ba jerente EDTL,EP tenke book-aan moris tanba osan ba funsionáriu sira hosi Eletrisidade Timor Leste (EDTL) nia konta bankária ne’e tarde liu.

“EDTL ne’e agora sira transforma ba Empreza Públika dala ruma nia-sistema mudansa, entaun ho buat sira-ne’e hotu implika ba prosesu ita-nia servisu na’in sira-ninia vensimentu. Agora atu aselera ida-ne’e, presiza hetan osan ne’e mak jerente sira iha ne’ebá mak tenke book-aan moris,” Daniel Santos do Carmo ba jornalista sira hafoin ramata partisipa reuniaun Konsellu Superiór Defeza no Seguransa (KSDS) ho Prezidente Repúblika, iha Palásiu Prezidensiál Nicolau Lobato, Bairu Píte, Dili, kuarta ne’e.

Nia dehan, se ema sira iha ne’ebá book-aan moris, hatene koordena, kolabora mak kestaun hanesan ne’e bele rezolve loron ida, rua, to’o semana ida.

“Ita husu ba jerente sira-ne’ebé kaer EDTL ne’e, sira prontu ona simu estatutu hanesan Empreza Públiku, sira mós tenke mellora sira-nia jestaun ne’e. Liuliu kapasidade jerente sira-ne’e oinsá mak jere situasaun sira-ne’e, atu responde ema-nia lamentasaun sira kona-ba saláriu ne’e, atu bele motiva ema bele halo servisu ho di’ak,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here