Ilustrasaun karreta kontentór movimenta iha estrada públiku. Imajen/Espesiál

DILI, 24 fevereiru 2021 (TATOLI)—Autoridade Portuáriu Timor-Leste (APORTIL) hamutuk ho Autoridade Aduaneira (AA)/Alfándega halo akompañamentu ba movimentasaun karreta boot kontentór halo sirkulasaun bazeia ba oráriu ne’ebé mensiona iha despaisu konjunta ne’ebé Governu fó sai.

Tuir despaisu konjunta ne’ebé asina no fó sai hosi Ministériu Transporte no Komunikasaun no Ministru Interiór, oras ne’ebé kontentór labele sirkula maka hahú tuku 7:00-9:00 dadeer, tuku 12:00-14:00 lorokraik no tuku 17:00-21:00 kalan.

Prezidente Konsellu Administrasaun APORTIL, Flávio Cardoso, hateten ekipa hosi parte rua ne’e observa to’o oras kalan ne’ebé mensiona iha despaisu no iha posibilidade sei hato’o rekomendasaun ba parte kompetente iha ministériu.

“Ita seidauk rona istória ida katak ema tuda kntentór iha tempu kalan, maibé importante maka ita tenke prepara rekursu atu haree ba ema no sasán sira ne’ebé atu tula iha tempu kalan, maibé movimentasaun kontentór  iha tempu kalan la’o di’ak,” nia hateten ba Agência TATOLI, iha ninia knaar fatin, Portu Dili, kuarta ne’e.

Notísia relevante: Polísia aplika ona koima ba karreta kontentór ne’ebé viola oráriu sirkulasaun

Prezidente APORTIL nota katak dalaruma públiku laduun akompaña oráriu sirkulasaun karreta kontentór sira.

“Públiku nia hanoin despaisu konjuntu ne’e atu responde kontentór halo sirkulasaun iha tempu kalan de’it, maibé tempu loron mós iha maibé la’ós iha tempu ne’ebé movimentu maka’as,” nia hatutan.

Flávio Cardoso dehan, bainhira sasán tama iha Portu Dili maka to’o tempu atu sai maibé la’ós oras sai maka ekipa sira sei la fó sai.

“Sira bele halo bonkar muat iha ne’e (Portu Dili) no bainhira mai ami loke tuir oras, kuadu oras dehan kontentór sira sai, maka funsionáriu APORTIL loke odamatan maibé seidauk oras maka ami la fó sai,” Flávio Cardoso tenik.

Aleinde ne’e, parte APORTIL koopera mós ho Polísia Nasionál Timor-Leste (PNTL), nune’e bainhira iha infrasaun ruma bele aplika sansaun.

“Agora ita halo koordenasaun ho Polísia sira atu halo kontrolu, tanba sira maka hatene muito bem sansaun saida maka presiza aplika bainhira karreta boot sira sirkula iha oras ne’ebé determina ona,” Flávio Cardoso katak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here