Mikrolete iha Kapitál Dili. Imajen TATOLI/António Gonçalves

DILI, 24 fevereiru 2021 (TATOLI)Xefe Departementu Rejistu Veíkulu hosi Diresaun Nasionál Transporte Terrestre (DNTT), Nelson Xavier Martins, husu kondutór transporte públiku mikrolete atu kumpre aplikasaun tarifa ba estudante sira ne’ebé hatuur ona iha diploma ministeriál Ministériu Transporte no Komunikasaun (MTK).

“Ha’u husu kondutór sira tenke halo tuir despaisu ne’e, bainhira viola diploma ministeriál hodi hasa’e tarifa tuir kondutór sira-nia hakarak no rona keixa hosi komunidade sira, maka parte DNTT sei foti medida,” Xefe Departementu Rejistu Veíkulu informa ba Agência TATOLI via telefónika, kuarta ne’e.

Despaisu MTK ne’ebé hasai iha tinan kotuk no válida to’o agora, mensiona katak tarifa ba kada pasajeiru estudante sentavu $0,15 ba kada destinasaun, enkuantu ba ema bain-bain sentavu $0,25.

Nia dehan, bainhira kondutór sira la kumpre maka sei aplika sansaun selu koema $30 to’o $35.

“Ha’u fiar katak kondutór sira sei la viola regulamentu, tanba ne’e husu kumpre nafatin regra ne’ebé maka iha ona,” nia akresenta.

Iha sorin seluk, Kondutór Mikrolete 03 (dirasaun Bidau), Cesário da Silva, hateten dala barak estudante no komunidade selu la tuir tarifa ne’ebé maka iha.

“Sira hasai ona regulamentu tarifa ne’e loos, maibé ita-nia maluk estudante no komunidade sira seluk maka dala ruma selu la tuir regulamentu ne’ebé iha,” nia dehan.

Kondutór transporte públiku ne’e haktuir, estudante sira dala ruma selu sentavu $0,10 no ema bain-bain selu sentavu $0,15 to’o $0,20.

“Situasaun sira ne’e maka halo maluk kondutór sira lamenta no halo greve. Ami hakarak ema hotu kumpre regulamentu ne’ebé iha. Ha’u hanoin pasajeiru sira maka tenke konsiente ba ida-ne’e,” Cesário akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here