Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 24 fevereiru 2021 (TATOLI)—Sekretáriu Estadu Komunikasaun Sosiál (SECOMS-sigla portugés), Merício Juvinal dos Reis “AKARA” husu ba Administradór Munisípiu Aileu, Abel da Conseção, atu akompaña prosesu dezenvolvimentu iha área komunikasaun sosiál iha Aileu durante ninia mandatu.

SECOMS hato’o pedidu ne’e, iha Palasiu Governu Dili, hafoin simu relatóriu servisu husi Administrádor Aileu ne’ebé antes ne’e, asume mós kargu hanesan Diretór Direasaun Nasionál Promosaun no Dezenvolvimentu Mídia Lokál.

“Ba parte mídia nian, ha’u hakarak husu ba ita-boot tau matan mós ba mídia lokál sira, tanba antes ne’e, ha’u bá Aileu Administradór sesante dehan katak partisipasaun mídia nian iha munisípiu ladun la’o. Tanba ne’e, agora ita-boot nia mandatu haree mós partisipasaun mídia lokál, oinsá partisipasaun mídia nian la’o fila-fali,” Merício Juvinál dos Reis “Akara” hateten liuhosi nia diskursu, bainhira simu relatóriu servisu iha kuarta  ne’e.

Akara informa iha tempu badak nia-laran Sekretáriu Estadu Komuniasaun Sosiál sei lansa tan Sentru Informasaun foun iha Munisípiu Aileu, liu-liu iha Suku Seloi-Kraik.

Governante mós husu ba Administradór foun ne’e atu fó kontribuisaun ba dezenvolvimentu Radiu Komunidade Rai Husar.

“Atu nune’e ita bele servisu di’ak no fahe formasaun ne’ebé di’ak liután ba ita-nia komunidade, tanba Kolaborasaun ita-boot nian mak determina ita-nia programa sira-ne’ebé ita planu ona ne’e ba oin,” nia dehan.

Entretantu, Administradór Munisípiu Aileu, Abel da Conseção, hateten nia parte prontu atu servisu hamutuk ho SECOMS, no Instituisaun Estadu seluk ba dezenvolvimentu Munisípiu Aileu.

Jornalista :Arminda Fonseca

Editór :Agapito dos Santos

HAKEREK NO HATÁN

Please enter your comment!
Please enter your name here