Administradór Munisípiu Aileu, Abel da Conceição halo juramentu. Imajen/Abekha Raihusar.

DILI, 24 fevereiru 2021 (TATOLI)—Administradór Munisípiu Aileu, Abel da Conceição hateten, durante ninia mandatu mak sei konsentra ba dezenvolvimentu iha Munisípiu Aileu liuliu iha dezenvolvimentu rekursu umanu, infraestrutura báziku, prepara planu mapamentu, no seluk tan.

“Nuudár Administradór foun ha’u-nia vizaun no planu prioridade agora ne’e, ha’u tenke  haree nesesidade komunidade nian liliu haree atu prepara rekursu umanu iha munisípiu Aileu, prepara infraestrutura bázika, peprara planu mapamentu atu organiza oinsá sidade Aileu ne’e ba futuru nian, kontrolu ba iha movimentu transporte sira ne’ebé mak hanesan Estadu nian funsionáriu sira tenke uza tuir-nia tempu, no haree kona-ba polítika suporta SISKA atu halo atendimentu saúde ba komunidade no seluk tan,” nia dehan, ba Agência TATOLI iha Salaun SECOMS, Palásiu Governu, Dili, kuarta ne’e.

Notísia Relevante :Governu husu Administradór Aileu asegura funsionamentu servisu administrasaun lokál

Nia informa responsabilidade ne’ebé maka nia asume atu oinsá tulun Governu Sentrál hodi implementa programa dezenvolvimentu iha Aileu liliu ba povu ninia moris di’ak.

Atu atinje dezenvolvimentu ida di’ak, tuir-nia dahuluk povu mak tenki  hetan moris diak .

“Planu priodade atu ezekuta uluk mak ha’u atu hala’o iha ha’u-nia mandatu mak ha’u sei halo revista ba iha kada servisu munisipál sira haree saida mak sira halo tiha ona iha tinan ida ne’e prioridade saida mak sira halo. Bainhira ha’u inteira loloos ona ho planu asaun anuál 2021 nian mak ha’u akompaña ba implementasaun Planu Asaun ba 2021 nian iha munisípiu Aileu,” tenik tan.

Mezmu iha ona planu prioridade lubuk ida maibé, ba tinan 2021 nia hateten sei kontinua hatutan polítika Administradór sesante nian ne’ebé trasa ona durante tinan ne’e.

“Planu asaun ba tinan ida ne’e iha tiha ona tanba Administradór Munisípiu sesante halo tiha ona no orsamentu mós tau tiha ona ne’ebé ha’u kontinua de’it. Tanba orsamentu ba programa 2021 nian aprovadu tiha ona entaun saida mak administradór sesante tau ona planu prioridade iha 2021 entaun ha’u ba kontinua de’it, tanba ne’e ha’u-nia planu prioridade sira ne’e sei implementa iha 2022,” nia haktuir.

Notísia Relevante :Administradór foun tenke promove insentiva partisipasaun sívika konstrutiva

Jornalista: Arminda Fonseca

Editór: Agapito dos Santos

HAKEREK NO HATÁN

Please enter your comment!
Please enter your name here