Komandante Jerál PNTL, Komísariu Faustino da Costa. Imajen TATOLI/Egas Cristóvão

DILI, 23 fevereiru 2021 (TATOLI)–Komadante Jerál Polísia Nasionál Timor-Leste (PNTL), Komisáriu Faustino da Costa, klarifika negosiante na’in-43 hosi munisípiu Bobonaro ne’ebé Polísia eskuadra kaer iha munisípiu Lautém iha tersa (23/02), maioria hela kleur ona iha Lautém.

“Tuir informasaun ne’ebé mak ami simu, ema sira ne’e halo negósiu iha ne’ebá no balun hela tan iha merkadu iha parte Lospalos,” Komadante Jerál PNTL hateten iha Sentru Formasaun Polísia, Comoro, tersa ne’e.

Notísia relevante: Reuniaun KM: deside bandu deslokasaun munisípiu seluk bá Bobonaro-Covalima

Maski nune’e, Komandu munisípiu Lautém seidauk submete relatóriu ba Komandu Jerál.

“Ami seidauk hatene ema hirak ne’e sera que hosi Bobonaro maka bá fa’an iha ne’ebá ka oinsá. Tanba ita boot sira hatene, Bobonaro ne’e bainhira halo negósiu iha ne’ebé deit inklui iha Dili laran mós barak,” nia akresenta.

Iha biban ne’e, nia parte husu komunidade munisípiu Bobonaro no Covalima atu kumpre serka sanitária bazeia ba desizaun Governu, tanba bainhira la kumpre maka konsidera sidadaun halo infrasaun.

“Bainhira sai hosi munisípiu rua ne’e prosesu seluk, maibé bainhira ita hakarak bá iha munisípiu rua ne’e, serka sanitária hotu maka foin bele sai, ne’e laiha exepsaun,” Komisáriu Faustino fó hanoin.

Iha loron 15 fevereiru 2021, Governu liuhosi desizaun Konsellu Ministru deside halo serka sanitária ba munisípiu Bobonaro no Covalima, ne’ebé sei prodús efeitu iha loron tuirmai ba ninia publikasaun no termina iha tuku 23:59 loron 03 marsu 2021.

Aleinde ne’e, ekipa saúde ho koordenasaun hosi Sentru Integradu Jestaun Krize (CIGC, sigla portugés) halo rastreiu ba abitante hosi munisípiu Bobonaro, Covalima inklui Rejiaun Administrativa Espesiál Oé-cusse Ambeno (RAEOA).

Nune’e, rezultadu teste ne’ebé fó sai iha tersa (23/02) hatudu katak amostra 1.022 hosi munisípiu Bobonaro 100% ho rezultadu negativu, enkuantu amostra 851 hosi munisípiu Covalima hatudu katak 99% ho rezultadu negativu (reprezenta ema na’in-847) no haat seluk pozituvu.

Rezultadu teste ba amostra 252 iha RAEOA hatudu 100% negativu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here