Traballadór sira hatun foos iha Portu Dili. Imajen TATOLI/António Gonçalves

DILI, 23  fevereiru 2021 (TATOLI)-Ministériu Turizmu, Komérsiu no Indústria (MTKI) liuhosi ekipa tékniku sira ne’ebé koopera hamutuk ho Autoridade Inspesaun no Fiskalizasaun Atividade Ekonómiku, Sanitária no Alimentasaun, Institutu Públiku (AIFAESA,IP), halo ona observasaun iha terrenu maibé seidauk deteta folin foos sa’e iha merkadu.

“Governu esforsu atu minimiza folin foos sa’e iha merkadu no ami halo intervensaun rápida liuhosi ami-nia tékniku sira, ne’ebé hatudu katak folin foos sei normál iha merkadu territóriu no tuir estandarte,” Diretór Jerál Indústria MTKI, Carlos Ximenes, hateten iha edifísiu Ministériu Agrikultura no Peska (MAP), Comoro, tersa ne’e.

Kona-ba Munisípiu balun ne’ebé folin foos sa’e, nia dehan, orienta ona ekipa tékniku sira iha kada munisípiu atu halo intervensaun hodi haree kompañia ne’ebé mak halimar ho folin iha merkadu.

Notísia relevante: Foos folin iha Fatumea sa’e ba $16.00 to’o $17.00

MTKI mós kontinua asegura folin foos ba nesesidade bázika hotu iha merkadu tenke tuir estandarte folin ne’ebé Governu atribui ona ba kompañia sira.

Iha sorin seluk, empreza balun mós iha razaun balun katak hasa’e folin tanba folin hosi nasaun orijen ne’ebé importa foos ho folin a’as, tanba ne’e foos ho kilograma 25 ne’ebé ho folin normál $9,50 bele sa’e to’o $11,50.

“Governu kontinua husu ba empreza sira atu hasa’e folin la liu $0,25  to’o $1. Ita haree  iha merkadu normalmente akontese duni bainhira ema presiza barak ,maibé ministériu rasik halo hela esforsu atu minimiza inflasaun iha merkadu,” Diretor Jerál ne’e afirma.

Governu iha medida atu regula folin nesesidade bázika iha merkadu, maibé loja balun nafatin hasa’e folin.

Nia informa, kona-ba foos importadu hosi Kombodia hamutuk tonelada 35.000 sei iha rezerva iha Sentru Lojíztika Nasonál (CLN, sigla portugés) atu halo intervesaun merkadu bainhira iha nesesidade iha situasaun COVID-19.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here