Ministru Finansa, Rui Augusto Gomes. Imajen TATOLI/Egas Cristóvão

DILI, 23 fevereiru 2021 (TATOLI)—Fundu rezerva seguransa sosiál to’o oras ne’e seidauk konsolida ho konta jerál Estadu, tanba ne’e Ministériu Finansa (MF) planeia atu integra nune’e bele aprezenta hamutuk konta jerál.

“Ami-nia intensaun hakarak intregra konta seguransa sosiál iha konta jerál Estadu, hahú hosi konta jerál tinan 2020 ba oin, nune’e bele iha konta própriu iha konta jerál tezouru hodi hafasil konsolida orsamentu,” Ministru Finansa, Rui Augusto Gomes, hateten iha ámbitu diskusaun konta jerál Estadu 2019, iha sala plénariu, Parlamentu Nasionál, tersa ne’e.

Tuir governante ne’e, bainhira enkuadramentu Orsamentu Jerál Estadu (OJE) hetan ona aprovasaun mak sei halo revizaun ba planu konta tezouru no klasifikasaun orsamentál.

Aleinde ne’e, Governu mós hein aprovasaun planu konta úniku ba setór públiku administrativu tomak atu nune’e konta hotu sei totalmente kompatível no sei la eziste problema iha konsolidasaun.

Seguransa sosiál nu’udar direitu fundamentál tuir deklarasaun universál direitu umanu iha artigu 14, ne’ebé liuhosi deklarasaun ne’e, Estadu Timor-Leste konsagra kedas direitu ne’e iha Konstituisaun artigu 56 ne’ebé iha pontu ida hateten katak sidadaun hotu iha direitu ba seguransa no asisténsia sosiál tuir lei no knaar Estadu nian.

Rejime kontributivu seguransa sosiál hateten katak, Estadu iha obrigasaun atubele promove no organiza tuir lei hodi haktuir ba direitu konstitusionál ida-ne’ebé Estadu organiza.

Iha loron 16 setembru 2020, Governu estabelese fundu rezerva ba seguransa sosiál, ne’ebé verba hosi fundu sei foti hosi seguransa sosiál no sei la konsidera nu’udar fundu públiku.

Iha tinan 2020, Institutu Nasionál Seguransa Sosiál (INSS) rejistu funsionáriu públiku no traballadór setór privadu pur volta 100.000.

Dekretu-lei númeru 47 mensiona katak kontribui ba seguransa sosiál ne’e hamutuk 10%, ne’ebé kompostu hosi 4% hosi traballadór no 6% hosi empregadór.

Nune’e, bainhira kada fulan simu saláriu, seguransa sosiál sei ko’a osan 4% hosi traballadór no 6% kontribui hosi empregadór.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here