Estadu Maiór Jenerál F-FDTL, Koronél Calisto dos Santos ‘Coliati’. Imajen TATOLI/Egas Cristóvão

DILI, 23 fevereiru 2021 (TATOLI)—Membru FALINTIL-Forsa Defeza Timor-Leste (F-FDTL) laiha dúvida atu simu aimoruk vasina kombate COVID-19 ba faze dahuluk, hosi Ministériu Saúde (MS).

Tuir Xefe Estadu Maiór Jenerál F-FDTL, Koronél Calisto dos Santos ‘Coliati’, membru sira prontu tanba konsidera importante ba saúde hodi prevene moras.

“Sein dúvida, Militár sempre prontu kualker tempu tanba vasina ne’e importante tebes. Moras Corona ne’e sai preokupasaun ba ema iha mundu tomak,” Koronél Coliati hateten iha Kuartél Jerál F-FDTL, Fatuhada, tersa ne’e.

MS no Organizasaun Mundiál Saúde (OMS) halo ona koordenasaun hodi halo sosializasaun ba membru Militár sira atubele kumprende didi’ak kona-ba prevensaun COVID-19 liuhosi vasina.

Enkuantu, iha parte seluk ofisiál programa imunizasaunhosi hosi MS, Manuel Mausiri, hateten forsa sira hanesan F-FDTL ho Polísia Nasionál Timor-Leste (PNTL) konsidera hanesan liña frente ba defeza no seguransa, tanba ne’e presiza halo protesaun saúde nune’e bele sai ezemplu ba sosiedade sira no bele kumpre mós regra OMS.

Governu liuhosi reuniaun Konsellu Ministru antes ne’e aprova ona planu vasinasaun nasionál kontra COVID-19, ne’ebé tuir rekomendasaun OMS, vasina di’ak liu ba Timor-Leste maka AstraZeneca, tanba konsidera vasina ne’e seguru, efikáz, no iha kondisaun nesesáriu hanesan armazenamentu no refrijerasaun atu rai.

Planu ne’e iha prinsípiu universál, gratuita, asesibilidade no ekuidade, maibé vasina ne’e la’ós obrigatóriu.

Ba faze dahuluk, sei prevee vasina ba populasaun 8%, no hosi 3% destina ba traballadór iha liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre.

Aleinde ne’e, iha faze dahuluk ne’e, 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Faze daruak sei abranje mós profisionál saúde, profesór sira, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% ba populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here