Enkontru membru F-FDTL iha Kuartél Jerál Fatuhada, tersa (23/02). Imajen TATOLI/Egas Cristóvão

DILI, 23 fevereiru 2021 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Koronél Calisto dos Santo ‘Coliati’, rekoñese movimentu ilegál iha área fronteira terrestre buras tanba menus membru kolokadu.

“Fízikamente, forsa armada hamutuk ho Polísia sira bele dehan seidauk sufisiente tanba ita hatene katak área liña froteira terrestre luan tebes. Hahú hosi fronteira Mota-ain to’o Mota-masin hanesan área ida ne’ebé mak luan, entaun prezensa membru sira bele dehan mínimu,” Koronél Coliati deklara iha Kuartél Jerál F-FDTL, Fatuhada, tersa ne’e.

Nia dehan, razaun komandu menus rekursu umanu tanba hahú hosi tinan 2015 to’o agora seidauk iha rekrutamentu ba membru foun.

“Tanba ne’e mak forsa la to’o atu koloka iha fronteira terrestre iha Timór laran tomak,” nia akresenta.

Enkuantu, unidade territoriál ne’ebé kompostu husi F-FDTL no Polísia Nasional Timor-Leste (PNTL) hamutuk batallaun ida sei koloka hodi reforsa seguransa iha liña fronteira terrestre no tasi, ne’ebé koordena hosi Sala Situasaun Sentru Integradu Jestaun Krize (CIGC, sigla portugés), hamutuk membru na’in-20 ba kada unidade.

Membru sira koloka hahú hosi Manduki, Mota-ain, Batugade to’o iha Mota-masin ho totál Militár hamutuk na’in-160, inklui  mós iha fronteira área Oé-cusse no Atauru no Same to’o Betano hamutuk na’in-210.

Hahú loron 06 to’o 23 janeiru 2021, Komisaun Rekrutamentu Konjunta hosi Ministériu Defeza (MD) hamutuk F-FDTL desloka ona iha munisípiu tomak hodi rekolla formuláriu vaga rekrutamentu ba membru Militár.

Durante prosesu rekrutamentu, loke vaga to’o taka, komisaun distribui ona formuláriu hamutuk 21.000.

Iha prosesu ikus liu maka, komisaun sei hili ema na’in-600 hodi halo teste hodi haree kandidatu sira-nia kondisaun fíziku, saúde, mentalidade,no psikolojia, hafoin simu kandidatu sira hodi tuir treinamentu.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here