Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 23 fevereiru 2021 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hatete maiória Ema ho Defesiénsia (EhD) drop out ka sai hosi eskola tanba eskola barak mak laiha asesibilidade.

Notísia Relevante: Tempu badak, Governu sei aprezenta PAN EhD ba Konsellu Ministru

“Kona-ba ema ho defesiénsia ne’ebé mak sai hosi eskola ne’e, problema dahuluk mak profesór ne’ebé atu hanorin ema ho defisiénsia menus. Problema daruak mak kuaze eskola hotu-hotu laiha asesibilidade ba defisiénsia sira atu asesu eskola,” Rui Manuel Gago Exposto hateten ba Agência TATOLI Relasiona ho komemorasaun Loron Mundiál ba Justisa Sosiál ne’ebé mundu selebra kada 20 fevereiru, iha nia knaar fatin, Caicoli, Dili, tersa ne’e.

Nia hatutan, kona-ba inkluzaun sosiál ho edukasaun inkluzivu ne’e iha problema rekursu umanu no fasilidade, mak Ema ho Defisiénsia sira defisil atu asesu ba edukasaun. Dala barak infraestrutura fíziku la asesivél entaun defisíl ba Ema ho Defisiénsia sira atu asesu ba eskola.

“Realidade ne’ebé mak akontese iha Timor-Leste mak Ema ho Defisiénsia balun mak hetan ona lisensiatura no maesteradu iha universidade balun iha Timor-Leste. Ita hein elaborasaun Planu Asaun Nasionál ba ema ho defisiénsia finaliza lalais para bele lori ba Konsellu Ministru hodi hetan aprovasaun no hetan apresiasaun, nune’e bele implementa iha kada ministériu sira,” nia hateten.

Tanba ne’e, nia hatutan, parte Ensinu Superiór mós bele konklui nia planu balun liuliu rekursu umanu, fasilidade inklui ho infraestrutura ne’ebé iha asesibilidade, para ema ho defisiénsia bele asesu ba eskola iha ensinu superiór.

“Buat hirak ne’e hotu kleur. Maibé, ha’u fiar katak neineik no ba beibeik, ita sei to’o ita-nia objetivu rasik. Katak, Ema ho Defisiénsia (EhD) mós iha direitu hanesan ho ema normál sira no asesu livre ba saida de’it,” nia esplika. Gago iha esperansa no garante katak Planu Asaun Nasionál ba EhD ne’e sei hanesan dalan no prosesu atu Ehd bele asegura, proteje no promove sira-nia direitu.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here