Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 23 fevereiru 2021 (TATOLI)—Komisaun C (Finansa Públika) husu Governu hamosu planu estratéjiku hodi hasa’e doméstika hodi redús dependénsia ba fundu petrolífera.

Rekomendasaun lubuk ida hosi Komisaun liuhosi debate Konta Jerál Estadu (KJE) 2019 nian hodi Governu kumprimenta tanba perímetru orsamentál 2019 nian iha dezorsamentasaun.

Iha relatóriu no paresér Komisaun C nian rekomenda ba Parlamentu Nasionál re-abertura proposta-lei relasiona ho rekuperasaun no jestaun ativu estadu nian ne’ebé kaduka iha 2015 ba forma projetu-lei.

“Komisaun C rekomenda Governu implementa polítika estratéjiku ida hodi hasa’e reseita doméstika naun-petrolífera no presiza halo redusaun signifikativa, progresiva ba dependénsia ba reseita hosi petróleu, redus gastu reseita petrolífera em cima Rendimentu Sustentál Estimadu (RSE) hodi finansia despeza korrente sira,” Prezidente Komisaun C, Deputada Maria Angélica Rangel, halo leitura ba relatóriu no paresér iha debate Konta Jerál Estadu (KJE) 2019 nian, iha plenária Parlamentu Nasionál, tersa ne’e.

Komisaun C rekomenda kolokasaun fundu kapitál umanu tenke foka iha kualidade ensinu no asegura konkordánsia no transparénsia iha konkursu públiku sira predominánsia ajustu direitu.

Komisaun husu Governu asegura unidade universidade no espesifikasaun orsamentu bem como plena konsolidasaun iha konta públika no unidade tezouraria iha termu esplanada Kámara Konta no repetida reiterada ba komisaun.

Komisaun Finansa Públika ne’e husu Governu implementa kontrolu rigorozu no efikáz ba despeza korrente inklui despeza viajen no uza rezerva kontinjénsia kada tinan fiskál.

“Asegura kontrolu internu entidade autónomu sira no responde ba autonómia finanseira no insitutu públiku sira tenke aprezenta reseita doméstika bianhira iha aprezentasaun orsamentu. Kria liña koordenasaun entre liña governamentál inklui ministériu hotu-hotu ho sentidu akompaña melloramentu ezekusaun orsamentál,” Komisaun C rekomenda.

Paresér Komisaun C ne’e nian, kongratula fiskalizasaun Kámara Konta nian ho forma verdadeira no apropriada intermu materialmente relevante kona-ba ezekusaun orsamentál 2019 nian tanba bazea norma no prinsípiu aplikavel.

Tanba iha auditoria hosi Kámara Konta deskobre perímetru orsamentál hosi Autoridade Nasionál Petróleu no Minerál (ANPM), Institutu Petróleu no Jeolojia (IPG) no Rejiaun Administrativa Espesiál Oé-Cusse Ambeno (RAEOA) iha dezorsamentasaun atentária iha unidade universidade orsamentál.

Prezidente Parlamentu Nasionál, Deputadu Aniceto Longuinhos Guterres, apresia ho relatóriu no paresér Komisaun C nian ne’ebé aborda di’ak tebes.

Ministru Finansa Rui Gomes sei responde relatóriiu no paresér Komisaun Finansa Públika nian iha sesaun lokraik.

Jornalista: Evaristo Soares Martins

Editór: Cancio Ximenes   

 

HAKEREK NO HATÁN

Please enter your comment!
Please enter your name here