MS no OMS disemina informasaun vasina kontra COVID-19 ba membru PNTL, iha Sentru Formasaun Polísia, Comoro, tersa (23/02). Imajen TATOLI/Natalino Costa

DILI, 23 fevereiru 2021 (TATOLI)—Ministériu Saúde (MS) hamutuk ho Organizasaun Mundiál Saúde (OMS) disemina informasaun kona-ba vasina kontra COVID-19 ba membru Polísia Nasionál Timor-Leste  (PNTL).

Komadante Jerál PNTL, Komisáriu Faustino da Costa, hateten iha planu nasionál vasina,  Komandu Jerál identifika ona membru ne’ebé sei simu vasinasaun dahuluk.

“Ami mak sei vasina iha loron dahuluk, ami identifika ona iha membru 100 maka sei vasina dahuluk. PNTL ne’e instituisaun Estadu, tanba ne’e bainhira iha programa hosi Governu, ami laiha dúvida tenke partisipa, a não ser ba hirak ne’ebé moras. Agora la presiza husu hakarak ka lae maibé sé maka serbisu loron no kalan presiza duni vasina hodi asegura-an,” Komadante Jerál PNTL informa hafoin partisipa iha disemina informasaun vasina, iha Sentru Formasaun Polísia, Comoro, tersa ne’e.

Nia dehan, bainhira iha vasinasaun ne’e maka deteta iha membru balun moras maka sei konfirma ba parte MS.

Tuir planu, vasina dahuluk sei envolve membru ne’ebé destaka iha área fronteira terrestre.

“Ita-nia fó prioridade ba hirak ne’ebé iha fronteira terrestre, membru sira ne’e laiha exepsaun tanba sira mak iha risku kontájiu COVID-19,” nia akresenta.

Membru PNTL daudaun destaka iha fronteira terrestre iha Rejiaun Administrativa Espesiál Oé-cusse Ambeno (RAEOA), Covalima no Bobonaro.

“Ita iha membru na’in-500 resin mak koloka iha fronteira terrestre, seidauk tan Unidade Patrullamentu Fronteira, unidade seluk ne’ebé destakadu iha ne’ebá hanesan Unidade Polísia Maritima no Unidade Espesiál Polísia,” nia hatutan.

Komadante Jerál PNTL otimista programa Governu  ba vasinasaun  ne’e sei la’o ho susesu tanba Polísia sei asegura másimu.

Iha sorin seluk, Xefe Departementu Promosaun Saúde, Misliza Vital, hateten objetivu MS no OMS halo advokasia ba institisaun Estadu sira relasiona ho vasinasaun tanba atu fó hatene  vantajen vasina ne’ebé sei halo’o iha tempu badak.

Nia hatutan, programa ne’e atu proteje ema-nia isin kontra moras COVID-19, liu-liu proteje-an hosi trasmisaun lokál iha Timor-Leste.

“Tanba ne’e, ami husu membru PNTL no públiku tomak labele fiar boatu ne’ebé lansa iha rede sosiál relasiona ho vasina,” nia fó hanoin.

Governu liuhosi reuniaun Konsellu Ministru antes ne’e aprova ona planu vasinasaun nasionál kontra COVID-19, ne’ebé tuir rekomendasaun OMS, vasina di’ak liu ba Timor-Leste maka AstraZeneca, tanba konsidera vasina ne’e seguru, efikáz, no iha kondisaun nesesáriu hanesan armazenamentu no refrijerasaun atu rai.

Planu ne’e iha prinsípiu universál, gratuita, asesibilidade no ekuidade, maibé vasina ne’e la’ós obrigatóriu.

Ba faze dahuluk, sei prevee vasina ba populasaun 8%, no hosi 3% destina ba traballadór iha liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre.

Aleinde ne’e, iha faze dahuluk ne’e, 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Faze daruak sei abranje mós profisionál saúde, profesór sira, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% ba populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here