Ema deskoñesidu tiru mate komunidade nia karau iha área Weto, Suku Dotik, Postu Administrativu Alas, Munisípiu Manufahi. Imajen/ Espesiál

DILI, 23 fevereiru 2021 (TATOLI)—Xefe Estadu Maiór FALINTIL-Forsa Defeza Timor Leste (F-FDTL), Koronél Calisto dos Santo ‘Coliati’, hateten Komandu simu ona relatóriu hosi komunidade relasiona ho kazu tiru karau tolu iha área Weto, suku Dotik, postu administrativu Alas, munisípiu Manufahi, ne’ebé deskonfia envolve membru Militár.

“Parte Komandu simu ona relatóriu hosi komunidade, autoridade lokál, no Polísia katak iha ne’ebá Militár la halo violasaun ka oho komunidade nia karau arbiru de’it,” Koronél Coliati dehan iha Kuatél Jerál F-FDTL, Fatuhada, tersa ne’e.

Notísia relevante: Kazu tiru karau iha Dotik, na’in ba karau tenke hato’o keixa  

Koronél Coliati hatuir, bazeia ba relatóriu, karau na’in no natar na’in, hamutuk ho autoridade lokál no lia na’in maka tur hamutuk hodi husu Militar tiru sira-nia karau ne’ebé estraga ona natar.

“Komunidade iha ne’ebá implementa ona tara bandu, tanba ne’e sé nia animál maka halo violasaun ruma, maka tenke hetan sansaun ne’ebé karau na’in husu atu oho, portantu Militár sira ba oho,” nia akresenta.

Maski nune’e, Komandu F-FDTL sei prosesa disiplinár ba membru ne’ebé uza kilat sala iha terrenu.

“Hosi parte Militár sein dúvida, bainhira membru ida iha terrenu hola inisiativa rasik uza kartus kilat sala, ne’e erru ida-ne’ebé tenke prosesa tuir regulamentu ho disiplina Militár,” Koronél Coliati afirma.

Tuir nia, membru ne’ebé uza  kilat hodi tiru komunidade nia karau, agora daudaun sei  kontinua nafatin hala’o serbisu iha terrenu hodi fó apoiu ba Sentru Integradu Jestaun Krize (CIGC, sigla portugés).

Kazu tiru komunidade nia karau akontese iha 14 janeiru tuku 21:20, hodi rezulta karau tolu mate, ne’ebé hosi hirak ne’e, rua mak konsege tula iha karreta, enkuantu ida seluk husik hela iha fatin akontesimentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here