Ministru Finansa, Rui Augusto Gomes. Imajen TATOLI/Egas Cristóvão.

DILI, 23 fevereiru 2021 (TATOLI)-Governu liuhosi Ministériu Finansa (MF) iha ona planu atu integra Autoridade Nasionál Petróleu no Minerál (ANPM, sigla portugés) no Insitutu Petróleu no Jeolojia (IPG, sigla portugés) iha Orsamentu Jerál Estadu (OJE) 2022.

“Hahú Hosi tinan 2022, ANPM no IPG sei integra iha Orsamentu Jerál Estadu, nune’e konta jerál Estadu sei ambrajente ba entidade tomak,” Ministru Finansa, Rui Augostu Gomes, hateten iha ámbitu diskusaun konta jerál Estadu tinan 2019 iha sala plénaria Parlamentu Nasionál, tersa ne’e.

Iha tinan 2020, Governu aprova ona rejime jurídiku organizasaun administrasaun direita no indireita sira atu uniformiza regra organizasaun no funsionamentu instituisaun administrativa públika.

Aleinde ne’e, iha mós regra ezekusaun orsamentu OJE 2021 ne’ebé prevee mós katak membru Governu ida-idak iha obrigasaun atu akompaña ezekusaun orsamentál  ba entidade outónomu sira ne’ebé integra iha administrasaun direita iha ministériu ne’e rasik, nune’e aumenta tan responsabilidade polítika.

Lejizlasaun ne’e mós prevee katak MF mak sei prepara lista ba órgaun no servisu  ne’ebé la kumpre obrigasaun.

“Atu asegura kompletude orsamentu mak iha tinan 2022 sei entrega ba Orsamentu Jerál Estadu, nune’e orsamentu sei abranje ba entidade tomak iha setór públiku administrativa hodi kumpre prinsípiu universál ne’ebé prevene ona iha lei,” nia akresenta.

Daudaun, MF halo hela melloria sistema previzasaun reseita atu hahú enskreve iha OJE hosi saldo entidade tomak.

Kona-ba Rejiaun Adminsitrativu Espesiál Oé-Cusse Ambeno (RAEOA), hahú iha loron 01 janeiru 2021 atualiza ona sistema informátiku jestaun finaseiru Estadu ka free balance.

Nune’e, MF bele asesu informasaun tomak kona-ba ezekusaun orsamentu rejiaun espesiál ne’e iha tempu reál.

“Ami mós fó ona formasaun adekuadu ba tékniku sira iha RAEOA atu sira bele rejista dadus ho kuidadu, atu nune’e informasaun ne’ebé aprezenta ho kualidade di’ak liutan,” nia akresenta.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here