Ministru Finansa, Rui Augusto Gomes. Imajen TATOLI/António Gonçalves

DILI, 23 fevereiru 2021 (TATOLI)Ministru Finansa, Rui Augusto Gomes, hateten daudaun ne’e VIII Governu Konstitusionál esforsu no hahú diskute estratéjia planu nasionál atu hasa’e reseita doméstika hodi redús dependénsia ba fundu petrolíferu.

“Iha tempu badak Governu sei aprezenta inisiativa kona-ba reforma jestaun ativu Estadu atu implementa desizivamente estratéjia ida atu aumenta reseita doméstika no redús signifikante dependénsia ba reseita fundu petrolíferu,” Ministru Rui dehan iha sala plenária Parlamentu Nasionál, tersa ne’e.

Iha tinan 2020, Governu liuhosi komisaun interministeriál ba reforma fiskál jestaun finanseiru públika harii ona sub-komisaun interministeriál ida atu halo reforma patrimóniu Estadu, ne’ebé sei elabora planu nasionál atu reforma duventáriu no jestaun patrimónia Estadu inklui mós inisiativa lejizlativa oin-oin.

Ministru Rui hato’o kestaun ne’e, hodi responde rekomendasaun lubuk ida hosi Komisaun C (Finansa Públika) liuhosi debate Konta Jerál Estadu 2019.

Iha relatóriu parser komisaun C, rekomenda ba Parlamentu Nasionál re-abertura proposta-lei relasiona ho rekuperasaun no jestaun ativu Estadu ne’ebé kaduka iha tinan 2015 ba forma projetu-lei.

“VIII Governu Konstitusionál kompromete atu utiliza reseita fundu petrolíferu ho forma responsável, liuliu esforsu oin-oin halo hela atu diversifika fonte finansiamentu atu nune’e redús presaun ba fundu soberanu ne’e,” nia akresenta.

Iha semestre daruak tinan ne’e, Governu sei aprezenta proposta ida ba revizaun lei tributária no kriasaun Impostu Valór Akresetadu (IVA),

Alende ne’e, Governu mós hakarak avansa ho regulamentu títulu dívida tezouru atu kria alternativa ida ba kontrasaun empréstimu konsesionál.

Iha OJE 2019, tranferénsia hosi fundu petrolíferu ho valór biliaun $1,4, maibé osan ne’ebé tranferénsia millaun $969 de’it, ne’ebé  fó impaktu pozitivu ba valór fundu petrolíferu iha tinan 2020 ne’ebé atinje biliaun $19-resin iha inísiu tinan 2021.

“Nune’e, Governu nia planu mak redús gradualmente levantamentu liu Rendimentu Sustentável Estimadu atu prezerva valór fundu petrolíferu,” ekonomista timor-oan ne’e tenik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here