Ministru Finansa, Rui Augusto Gomes. Imajen TATOLI/Egas Cristóvão

DILI, 23 fevereiru 2021 (TATOLI)-VIII Governu Konstitusionál planeia hakarak redús gradualmente levantamentu fundu petrolíferu liu Rendimentu Sustentável Estimadu (RSE) iha Orsamentu Jerál Estadu (OJE) kada tinan.

“Governu nia planu atu redús gradualmente levantamentu fundu petrolíferu liu Redimentu Sustentavél Estimadu atubele prezerva valór fundu petrolíferu ne’e rasik,” Ministru Finansa, Rui Augusto Gomes, hateten iha sala plenária Parlamentu Nasionál, tersa ne’e.

Governante ne’e ko’alia asuntu ne’e hodi responde preokupasaun deputadu no sosiedade sivíl, ne’ebé nota katak durante ne’e Governu la respeita lei númeru 9/2005 fundu petrolífera, iha artigu 9 kona-ba tranferénsia liu RSE.

“VIII Governu konstituisaun kada tinan respeita previzaun legál kona-ba realizasaun tranferénsia osan hosi fundu petrolíferu liu Redimentu Sustentável Estimadu, liuhosi justifikasaun no motivu ne’ebé lori levantamentu efetua ba interese Timor-Leste iha longu prazu,” nia hatutan.

Ministru esplika, durante ne’e Governu halo levantamentu liu RSE hodi finansia programa dezenvolvimentu ba interese povu no iha tinan 2021 ba implementasaun medida rekuperasaun ekonómika tanba krize globál ne’ebé rezulta hosi pandemia COVID-19.

“Levantamentu la’ós atu suporta despeza rekorrente relasiona ho funsionamentu administrasaun Estadu, maibé levantamentu fundu petrolíferu liu Rendimentu  Sustentável Estimadu hodi finansia konstrusaun infraestrutura rodaviária atu hakbesik populasaun ba servisu públiku no promove dezenvolvimentu ekonómiku iha zona rurál inklui transporta sasán ba merkadu,” nia akresenta.

Alende ne’e, Governu  uza mós ba investimentu projetu infraestutura liuliu rekuperasaun rede distribuisaun bee moos, eletrisidade no saneamentu iha territóriu nasionál tomak.

Nune’e mós, finansia kapasitasaun traballadór joven sira liuhosi formasaun profisionál no atribuisaun bolsa estudu liuhosi fundu dezenvolvimentu kapitál umanu.

Iha OJE 2021 ho montante biliaun $1,895, foti hosi reseita fundu petrolíferu hamutuk biliaun $1,377 no reseita naun petrolíferu hamutuk millaun $508.

Enkuantu, hosi totál reseita fundu petrolíferu biliaun $1,337 no millaun $547 foti bazeia ba RSE no transferénsia superiór liu RSE millaun $828.

Entertantu, iha artigu 9d lei fundu petrolíferu, mensiona katak bainhira Governu foti orsamentu finansia despeza OJE, mak presiza esplikasaun detalladu kona-ba motivu ne’ebé konsidera hanesan interese Timor-Leste ba longu prazu, atu efetua transferénsia ho montante superiór RSE.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here