Estadu Maiór Jenerál F-FDTL, Koronél Calisto dos Santos ‘Coliati’. Imajen TATOLI/Egas Cristóvão

DILI, 23 fevereiru 2021 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Koronél Calisto dos Santos ‘Coliati’, hateten daudaun sei halo preparasaun ekipamentu Militár iha ámbitu rekrutamentu membru foun ida tinan ne’e.

“Kondisaun ekipamentu individuál, hahú tinan 2019 prepara to’o ohin loron maibé seidauk kompleta. Bainhira farda, kilat no kilat-musan prontu hotu ona maka iha fulan-abríl sei kontinua prosesu rekrutamentu membru foun,” Koronél Coliati iha Kuartél Jerál F-FDTL, iha Fatuhada, tersa ne’e.

Hahú loron 06 to’o 23 janeiru 2021, Komisaun Rekrutamentu Konjunta hosi Ministériu Defeza (MD) hamutuk F-FDTL desloka ona iha munisípiu tomak hodi rekolla formuláriu vaga rekrutamentu ba membru Militár.

Durante prosesu rekrutamentu, loke vaga to’o taka, komisaun distribui ona formuláriu hamutuk 21.000, enkuantu tuir planu iha tinan ne’e sei rekruta membru foun hamutuk na’in-600.

Tuir Koronél Coliati, karik ekipamentu sira kompleta ona maka iha flesibilidade aselera halo prosesu rekrutamentu.

Kona-ba prosesu sosa kilat inklui kilat-musan, Governu halo ona prosesu sosa ekipamentu iha Singapura, maibé tanba krize polítika afeta ba orsamentu 2019 to’o 2020, maka halo prosesu hotu pendente to’o agora.

Tuir planu, iha marsu tinan ne’e, kompañia lokál hanaran Haksolok ne’ebé manan konkursu sei ba sosa direta farda iha TP-Sritex, Indonézia, ne’ebé posibilidade sei to’o iha marsu ka abríl 2021.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here