Ministru Agrikultura no Peska, Pedro dos Reis. Imajen TATOLI/Egas Cristóvão

DILI, 23 fevereiru 2021 (TATOLI)Ministru Agrikultura no Peska no Prezidente Komisaun Nasionál Servisu Tékniku ba Nutrisaun (KONSSANTIL), Pedro dos Reis, informa ekipa téknika hosi liña ministeriál, sosiedade sivíl no organizasaun mundiál ba Ai-han no Agrikultura (FAO, sigla inglés) hahú halo diskusaun ba preperasaun estatutu atu aprezenta ba Konsellu Ministru.

“Ami tuur hamutuk tanba presiza formula no deside estatutu KONSSANTIL atu avansa ba Konsellu Ministru, nune’e bele halo papél liga ba seguransa ai-han no nutrisaun iha Timor-Leste,” Ministru Pedro hateten hafoin enkontru ho ekipa téknika sira iha salaun MAP, Comoro, tersa ne’e.

Iha tinan kotuk, Timor-Leste tama lista mean ai-han laiha no má nutrisaun ne’ebé fó risku ba populasaun.

Tanba ne’e, Prezidente KONSSANTIL ne’e nota katak presiza funsiona komisaun nasionál ne’ebé ministériu hotu envolve hodi garante seguransa ai-han no nutrisaun kombate má nutrisaun iha rai-laran.

“Ha’u orienta ona Diretór Jerál no Nasionál sira hosi liña ministeriál atu mai tuur hodi hili ema na’in-tolu atu lidera ekipa hodi elabora lalais nia estatutu,” nia akresenta.

Ekipa téknika lidera hosi Ministeriu Agrikultura no Peska (MAP), reprezentante FAO inklui sosiedade sivíl.

KONSSANTIL harii iha tinan 2017 bazeia ba deklarasaun Comoro iha tinan 2012, ne’ebé kompostu hosi MAP, Ministériu Edukasaun, Juventude no Desportu (MEJD), Ministériu Saúde (MS), Ministériu Obra Públika (MOP), Ministériu Solidaridade Sosiál no Inkluzaun (MSSI), Ministériu Turizmu, Komérsiu no Indústria (MTKI), Ministériu Negósiu Estranjeiru no Kooperasaun (MNEK), no FAO hanesan parseiru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here